Maierrek berrikuntza estrategiaren gakoak hurbildu dizkie Industria Ingeniaritzako Masterreko ikasleei
Maierrek berrikuntza estrategiaren gakoak hurbildu dizkie Industria Ingeniaritzako Masterreko ikasleei
Maierrek berrikuntza estrategiaren gakoak hurbildu dizkie Industria Ingeniaritzako Masterreko ikasleei
Mondragon Goi Eskola Politeknikoak Maier enpresako ordezkari baten bisita jaso du aste honetan. Josu Ocerin, Maier enpresako Market Development Manager India, izan da hizlaria, eta Industria Ingeniaritzako Masterreko lehen mailako ikasleei zuzendutako saioa eskaini du, “Estrategia y gestión de la innovación tecnológica” ikasgaiaren baitan.
Hitzaldian, Maierrek sortu zenetik gaur egunera arte izan duen ibilbide estrategikoa aztertu du Ocerinek, azpimarratuz enpresaren hazkundea ez dela lineala izan. Kooperatibak bizi izan dituen etapa desberdinak eta etapa bakoitzean hartutako erabaki estrategikoek, bai arrakastatsuak izan direnek, baita espero baino emaitza apalagoak eman dituztenek ere, gaur egungo posizionamenduan izan duten eragina azaldu du. Ikuspegi horrek aukera eman die ikasleei estrategia ikaskuntza-prozesu jarraitu gisa ulertzeko.
Era berean, gaur egun estrategia nola lantzen duten ere azaldu du hizlariak: kanpo-ingurunearen (merkatuak, bezeroak, joera teknologikoak eta araudia) eta barne-gaitasunen analisitik abiatuta, estrategia korporatiboa nola definitzen den.
Helburu estrategiko horiek eguneroko jardunarekin, negozio-unitateekin eta produktu-arloekin nola lotzen diren azaldu du, baita estrategiaren jarraipena nola egiten duten ere, prozesu dinamiko eta etengabe egokitzen den baten modura ulertuta.
Industria Ingeniaritzako ikasleentzat, gai honek garrantzi berezia du, lan teknikoaren eta enpresaren norabide estrategikoaren arteko lotura ulertzeko aukera ematen duelako. Gainera, masterreko edukiekin guztiz lerrokatuta dagoen gaia da, ikasleek ikasgelan lantzen dituzten marko teorikoak industria errealitatearekin konektatzeko aukera ematen duelako.
