Musika Bulegoak eta Mondragon Unibertsitateko Humanitate eta Hezkuntza Zientzien Fakultateak elkarlanerako hitzarmena sinatu dute
Musika Bulegoak eta Mondragon Unibertsitateko Humanitate eta Hezkuntza Zientzien Fakultateak elkarlanerako hitzarmena sinatu dute
Musika Bulegoak eta Mondragon Unibertsitateko Humanitate eta Hezkuntza Zientzien Fakultateak elkarlanerako hitzarmena sinatu dute
Iker Durana Musika Bulegoaren zuzendari kudeatzaileak eta Nagore Ipiña Mondragon Unibertsitateko Humanitate eta Hezkuntza Zientzien Fakultateko dekanoak sinatu dute akordioa Aretxabaletako campusean egindako ekitaldian.
Musika Bulegoak eta Mondragon Unibertsitateko Humanitate eta Hezkuntza Zientzien Fakultateak elkarlanerako hitzarmena sinatu dute. Aretxabaletako campusean egindako ekitaldian Iker Durana Musika Bulegoko zuzendari kudeatzaileak, Amaia Ispizua zuzendaritzako kideak, Nagore Ipiña Humanitate eta Hezkuntza Zientzien Fakultateko dekanoak eta Xabi Igoa Komunikazioa ezagutza arloko zuzendariak hartu dute parte.
Formazioa eta sektorearen ikerketa helburu
Hitzarmenaren helburua erakunde bien arteko elkarlanari oinarria jartzea da formazioan, ikerketan eta musika sektorean eragina izatea bilatuko da.
Sinatutako hitzarmenak aurreikusten du erakunde bien arteko elkarlana Mondragon Unibertsitateko Humanitate eta Hezkuntza Zientzien Fakultateak abian jarri berri duen Kultur eta Sormen Industriak graduan.
Horrela, Euskal Herriko Musika Elkarteko profesionalek graduan parte hartuko dute. Horretaz gain, gradu berriko ikasleek aukera izango dute lan praktikak eta Gradu Bukaerako Lanak musika elkartearekin batera egiteko. Azkenik, erakunde biek adostu dute haien intereseko gaietan ikerketa, formazio eta sortu daitezkeen beste proiektu batzuetan elkarlanean aritzea.
Hitzarmenak jasotzen du bi erakundeei interesatzen zaiela beraien lankidetzako harremanak finkatzea, azpimarratuz garrantzitsua dela harreman estuak eta lankidetza eraginkorra izatea.
Sinadura ekitaldiaren ondoren, Iker Durana Musika Bulegoaren zuzendari kudeatzaileak adierazi du hitzarmen honek aukera ematen diela “musikaren sektorearen errealitatea unibertsitatera hurbiltzeko eta elkarrekin lan egiteko, ikasleek jardunean dauden profesionalengandik ikasteko aukera izan dezaten. Ziur gaude lankidetza horrek berrikuntza sustatuko duela eta gure inguruko kultura-ehuna indartuko duela”.
Bere aldetik, Nagore Ipiña Humanitate eta Hezkuntza Zientzien Fakultateko dekanoak “Musika Bulegoa kultur eta sormen industrietako agente garrantzitsu” bezala definitu du eta harreman honek bi norabideetan eragingo duela azpimarratu du: “batetik, gure ikasleek mundu profesionala ezagutzeko modua izango da eta bestetik, sektoreak dituen beharrei elkarlanean erantzuteko aukera bat ere bada”.
Erakunde bietako ordezkariek espero dute lankidetza hau emankorra izatea eta etorkizunean kultura- eta hezkuntza-arloko proiektu bateratuak sortzea.
Sinadura ekitaldiko argazkiak:
