Mondragon Unibertsitateak eta Hazikoop-ek lankidetzan jardungo dute Euskadin ekintzailetza teknologikoa eta kooperatiboa sustatzeko
Mondragon Unibertsitateak eta Hazikoop-ek lankidetzan jardungo dute Euskadin ekintzailetza teknologikoa eta kooperatiboa sustatzeko
Mondragon Unibertsitateak eta Hazikoop-ek lankidetzan jardungo dute Euskadin ekintzailetza teknologikoa eta kooperatiboa sustatzeko
Bi erakundeek lankidetza-hitzarmena adostu dute enpresa-proiektu berritzaileak bultzatzeko, ezagutza partekatzeko eta bakoitzaren ekintzailetza-programen arteko loturak sendotzeko.
Mondragon Unibertsitateko Goi Eskola Politeknikoak eta Hazikoop-ek lankidetza-hitzarmena adostu dute Euskadiko ekintzailetza teknologikoaren eta kooperatiboaren ekosistema indartzeko helburuarekin. Aliantza horri esker, enpresa-ekimen berritzaileak sustatu, ezagutza-trukea erraztu eta ekintzaileentzako aukera berriak sortu ahal izango dira.
Hitzarmenak bi erakundeen arteko lankidetza aurreikusten du enpresa-proiektuak identifikatu, orientatu eta laguntzeko, bereziki oinarri teknologikoa edo osagai digital nabarmena duten eta eredu kooperatiboaren bidez garatu daitezkeen proiektuak. Era berean, bi erakundeen gaitasunak, baliabideak eta esperientziak uztartzea du helburu, eragin ekonomiko, sozial eta ingurumenekoa duten ekimenak sortzen eta sendotzen laguntzeko.
Ekintzailetza-programen arteko loturak
Lankidetzaren ardatz nagusietako bat Hazikoop UP! eta Mondragon Unibertsitateko Industrial Sustainable Entrepreneurship Awards (MU ISE AWARDS) programen arteko loturak indartzea izango da.
Horrela, Mondragon Goi Eskola Politeknikoaren inguruan sortutako ekintzailetza-proiektuek Hazikoop UP! programak eskaintzen dituen aukerak ezagutu ahal izango dituzte. Programa horren helburua da enpresa-ekimen kooperatibo berritzaileak sustatzea, inkubatzea, azeleratzea eta sendotzea.
Era berean, Hazikoop UP! programari lotutako proiektuek MU ISE AWARDS sariek eta Goi Eskola Politeknikoaren ekintzailetzarako baliabideek eskaintzen dituzten aukeren berri jaso ahal izango dute, besteak beste, Hirekin zentroaren eta bertako laborategien inguruko informazioa. Programa bakoitzean parte hartzeko, dagokion deialdiko baldintzak eta hautaketa-prozesuak bete beharko dira.
Prestakuntza, ezagutza eta aukera berriak
Lankidetzak prestakuntza-jarduerak, tailerrak, saio teknikoak, mentoretzak eta profesionalen, adituen eta ekintzaileen arteko topaketak antolatzeko aukera ere jasotzen du. Horrez gain, bi erakundeek ekintzailetzarekin lotutako deialdien, programen eta ekitaldien zabalkundea koordinatu ahal izango dute.
Hitzarmen honen bidez, Mondragon Unibertsitateak eta Hazikoop-ek unibertsitatearen, berrikuntza teknologikoaren eta enpresa-sare kooperatiboaren arteko loturak sendotu nahi dituzte, Euskadin ekintzailetza-ekimen berrien garapena bultzatuz.
Hitzarmenak hasierako bi urteko indarraldia izango du, luzatzeko aukerarekin, eta epe horretan bi erakundeek interes komuneko jarduera eta proiektu berriak zehaztu ahal izango dituzte.