Ingeniaritza Biomedikoko ikasleek ikuspegi sozial eta teknologikoa duen beso protesiko bat garatu dute
Ingeniaritza Biomedikoko ikasleek ikuspegi sozial eta teknologikoa duen beso protesiko bat garatu dute
Ingeniaritza Biomedikoko ikasleek ikuspegi sozial eta teknologikoa duen beso protesiko bat garatu dute
HARREMAN proiektuari esker, ikasleek ingeniaritza biomedikoko ezagutzak beso protesiko funtzional baten garapenean aplikatu dituzte, berrikuntza teknologikoa, lankidetza eta pertsonengan oinarritutako ikuspegia uztartuz
Mondragon Goi Eskola Politeknikoko Ingeniaritza Biomedikoko lau ikaslek Harreman proiektua garatu dute, berrikuntza teknologikoa eta gizarte konpromisoa uztartzen dituen ekimena. Proiektuaren helburua esku eta beso protesi funtzional bat diseinatu eta garatzea izan da.
Alex Tabernero, Pablo Buján, Aitor Otermin eta Eneko Agirreoa ikasleek osatutako taldeak azken hilabeteetan proiektuaren garapenean lan egin du, erronka teknologikoez gain erabiltzaileen benetako beharretan ere arreta jarriz.
Harreman proiektua ingeniaritzaren garapena pertsonengana hurbiltzeko eta gizartean eragina izango duten irtenbideak sortzeko asmoz sortu da. Prozesu honetan, Xabi Osa CrossFit egokitutako kirolariaren laguntza izan dute, eta haren esperientzia eta ikuspegi praktikoa funtsezkoak izan dira protesiaren garapena bideratzeko.
Maila teknikoan, taldeak lehen prototipo bat garatu du, aktuadore lineal batean eta serbomotor batean oinarrituta. Sistema horrek pintza mugimendua eta eskumuturraren biraketa ahalbidetzen ditu. Kontrola, berriz, erabiltzailearen jarduera muskularra jasotzen duten sentsore elektromiografikoen bidez egiten da.
Joan den astean, taldea Valentziara joan zen II Eskuko Protesien Unibertsitate Lehiaketan (II-CMP-26) parte hartzera. Lehiaketa Universitat Politècnica de Valèncian egin zen, eta bertan Estatuko beste hainbat unibertsitatetako taldeekin esperientziak eta ezagutzak partekatzeko aukera izan zuten, berrikuntza, ingeniaritza eta garapen teknologiko aplikatua ardatz dituen ingurune batean.
Proiektuari esker, ikasleek ingeniaritza biomedikoko ezagutzak ingurune praktiko eta kolaboratibo batean aplikatzeko aukera izan dute, berrikuntzarekin, talde lanarekin eta pertsonen bizi kalitatea hobetzea helburu duten soluzio teknologikoen garapenarekin lotutako gaitasunak indartuz.
Gainera, Harreman proiektuak inguruko hainbat enpresa, ikastetxe eta eragile teknologikoren babesa izan du, ekimenaren izaera kolaboratiboa eta aplikatua indartuz.