Musika industriaren nazioarteko BIME jaialdiak eta Mondragon Unibertsitateak Euskadiko kultura eta sormen industrien ekintzailetza bultzatzen dute
Musika industriaren nazioarteko BIME jaialdiak eta Mondragon Unibertsitateak Euskadiko kultura eta sormen industrien ekintzailetza bultzatzen dute
Musika industriaren nazioarteko BIME jaialdiak eta Mondragon Unibertsitateak Euskadiko kultura eta sormen industrien ekintzailetza bultzatzen dute
Bi erakundeek hitzarmen bat sinatu dute, eta horri esker Unibertsitateko kultura-ekintzailetzako bi proiektuk BIMEren hurrengo edizioan parte hartu ahal izango dute. Edizio hori urriaren 27tik 30era egingo da Bilbon
Mondragon Unibertsitateko LEINN graduko bi ekintzailetza-proiektu hautatu dituzte BIME Startup proiektuen azokaren parte izateko, BIMEren eta Mondragon Unibertsitateko Enpresagintza Fakultatearen arteko lankidetza-hitzarmenari esker, Euskadiko Kultura eta Sormen Industrietan (KSI) ekintzailetza sustatzeko.
Horrenbestez, Mondragon Unibertsitateko SONDBOX (Irun) eta Rename (Bilbo) taldeek BIME musika industriaren nazioarteko topaketaren hurrengo edizioan parte hartuko dute. Ekitaldia urriaren 27tik 30era egingo da Bilboko Euskalduna Jauregian. Bertan, nazioarteko kultura eta sormen arloko erreferentziazko eragileak bilduko dira.
Bi erakundeek hilabeteak daramatzate hitzarmen hau garatzen Bilbao Berrikuntza Faktorian (BBF). Hitzarmenaren helburua kultura eta sormen industrietako ekintzailetza bultzatzea da, LEINN graduko ikasleak startup, enpresa, inbertitzaile eta sektoreko profesionalen arteko lotura-gune nagusietako batera hurbilduz. Lankidetzari esker, hazteko eta eragina izateko ahalmena duten ekintzailetza-proiektuak lagundu, azeleratu eta ikusgarritasuna emango zaie.
Mondragon Unibertsitatea BIME Startupean
BIME Startup ekimenari esker, hautatutako bi taldeek aukera izango dute beren ekimenak ekitaldiko erakusketa-gunean aurkezteko eta kultura eta sormen industrien ekosistemako nazioarteko eragileekin harremanetan jartzeko. Horrela, beren ekintzailetza-proiektuen ikusgarritasuna eta garapen-aukerak handituko dituzte.
Zehazki, SONDBOX taldea soinu-isolamendua duten kabinen proiektu bat garatzen ari da, sortzen ari diren musika eta ikus-entzunezko proiektuek erabili ahal izan ditzaten. Bestalde, Rename taldea artista berriei laguntzeko plataforma bat garatzen ari da, beren finantza-kudeaketa modu autonomoan egiteko aukera eskainiko diena.
Aliantza honen bidez, Mondragon Unibertsitateko Enpresagintza Fakultateak berresten du ekintzailetzarekiko duen konpromisoa, eraldaketarako tresna gisa, eta kultura sektorearen garapenarekikoa; Euskadirentzat estrategikoa den eremu bat baita. Era berean, BIME bezalako erreferentziazko eragileekin duen lankidetza sendotzen du, LEINNeko pertsona ekintzaileei merkatuarekin konektatzeko, aliantzak sortzeko eta beren proiektuak hazteko benetako aukerak eskaintzeko.