Mondragon Unibertsitateak eta EiTBk lankidetza hitzarmena sinatu dute

Atzera

Mondragon Unibertsitateak eta EiTBk lankidetza hitzarmena sinatu dute

Hitzarmena

Mondragon Unibertsitateak eta EiTBk lankidetza hitzarmena sinatu dute

Proiektu ezberdinetan elkarlana bultzatu eta Mondragon Unibertsitateko ikasleek beraien praktikaldia EiTBn egitea ahalbidetuko du, besteak beste, Maite Iturbek eta Vicente Atxak sinatutako akordioak.

2018·12·18

$titulo.getData()


Mondragon Unibertsitatearen eta Euskal Irrati Telebistaren arteko harremanari eta lankidetzari oinarri jartzea xede duen hitzarmena izenpetu dute bi erakundeetako arduradunek astearte honetan, abenduaren 18an. Maite Iturbe EiTBren zuzendari nagusiak Bilboko egoitzan hartu du Vicente Atxa Mondragon Unibertsitateko errektorea, eta bertan egin dute sinadura ekitaldia.

Hitzarmenak bi aldeen interesekoak diren proiektuetan elkarlana bideratzea ahalbidetuko du: ikerketan (esaterako, euskarazko komunikabideen esparruari eta informazioaren kontsumo ohiturei buruzko azterketak eginez), hezkuntza mediatikoaren arloan (komunikabideen inguruan erakusteko eta ikasteko modua landuz), aholkularitza kontuetan (unitate didaktikoak garatuz) edo sor litezkeen gainerako interesgune komunetan.

Mondragon Unibertsitateko ikasleei beraien praktikaldia EiTBn egiteko aukera eskainiko zaie. Halaber, bi erakundeen intereseko proiektuak jorratu ahal izango dituzte Mondragon Unibertsitateko gradu zein graduondoko ikasleek EiTBn.

Lankidetza honi esker, Mondragon Unibertsitateak ateak zabalduko dizkie EiTBko profesionalei eskolak eman ditzaten. Modu horretan, arlo akademikoa eta lan mundua uztartzeko egokiera eskainiko zaie hala profesionalei nola ikasleei.