Ekainaren 11n, goizeko 10:00etan, Haur Hezkuntzako ikasleek, 1. mailakoek zehazkiago esanda, "Munduari Bira" antzeztuko dute, antzerki lan bat eurek prestatua 5-6 urteko haurrentzat. Egun horretan, Luis Ezeiza herri ikastetxeko eta Arizmendi ikastolako haurrak etorriko dira Huhezira, antzerki lana ikustera, eurentzat propio prestatu da-eta antzezlana.

Haur Hezkuntzako ikasleek sei txoko prestatu dituzte bidaia antzezteko: Txina, India, Grezia-Erroma, Alaska, Mexiko eta Egipto, denak ere fakultatearen barruan. Horiez gain, fakultateko klaustroan akelarre bat antzeztuko dute.

Antzezlana prestatzeaz batera, Haur Hezkuntzako ikasleek blog bat sortu dute, Munduari Bira, eta hor prestakuntza lanen berri ematen ari dira. Urtero-urtero, Haur Hezkuntzako ikasleek antzerki lan bat prestatu eta antzeztu behar izaten dute, lehen mailan dabiltzan bitartean, lan bat bereziki haurrentzat sortua.