Albisteak

Oñati Gestio Heziketa Goiaz! Degagoienako Lanbide Heziketaren Azokan izango da.

Amaia Aizpuru — 2013-05-03T15:20:00Z

Maiatzaren 8an eta 9an, izango da aurten Goiaz! Debagoieneko Lanbide Heziketaren Azoka, Kulturaten. Debagoieneko Mankomunitateko Garapen Ekonomikorako Agentziak eta bailarako Lanbide Heziketa zentroek antolatuta, ikasketa horiek lanerako zabaltzen dizkieten aukerak erakutsi nahi dizkiete ikasleei, langabeei eta interesa duten guztiei.

Lanbide Heziketa ematen duten zentroek euren eskaintza azalduko dute Kulturaten, erakusketa-postuetan. Honako zentroak dira: Oñatiko Gestio Heziketa-MU eta Zuazola-Larraña Institutua; Bergarako Mariaren Lagundia ikastola eta Miguel Altuna institutua; Arrasateko Arizmendi Koop. Elkartea ikastola eta Goi Eskola Politeknikoa-MU; Aretxabaletako Lanbide Eskola; Helduen Heziketa Iraunkorreko Zentroa eta Hasierako Lanbide Prestakuntzarako Programa. Formazio zentro gisa, Arrasateko Bastida Akademia eta Bergarako Ikasi Prestakuntza Zentroa izango dira; baita Bizikasi eta Alecop ere.

Enplegu zerbitzuak ere ordezkatuta izango dira: Lanbide, Eures eta Kutxa Zeharo. Arrasate, Bergara, Oñati eta Aretxabaletako udaletako Sustapen eta Enplegu Zerbitzuak ere bertan egongo dira; eta ekintzaileendako zerbitzu gisa, Garapen Agentzia eta Saiolan. Garaionen eskutik, Lan-merkatura hurbiltzeko tailerra eta Ikasketa espezialitateak ezagutzeko bisita gidatuak izango dira etengabe.

Ekintza osagarriak ere antolatu dituzte:

Maiatzak 8:

09:30: Ekintzailetasun esperientziak (Ikasleentzako) 11:30: Interneten ze irudi ari naiz ematen? (Ikasleentzako) 17:00 Interneten lana bilatzeko erremintak, Miguel Fernandez Arrieta irakasle eta ikerlariak emanda. (Jende guztiarentzako).

Maiatzak 9: Lanbide Heziketaren sistema integratuak zer dauka langile eta langabetuei eskaintzeko? Ezagutu zure aukerak delako hitzaldia, Lanbideko Gloria Gonzalez Marco teknikariaren eskutik. 10:00etan, euskaraz izango da, eta 18:00etan, gaztelaniaz; bietan, Biteri Gelan izango da.

Mondragon Unibertsitateko LEINNeko ikasle batek GAZE proiektuan parte hartuko du EHU eta Tknikarekin batera.

Amaia Aizpuru — 2013-04-16T17:27:20Z

MU, EHU eta TKNIKA ordezkatzen duten hiru gaztez osaturiko diziplina anitzeko talde batek onartu du, aurten, GAZEn parte hartzeko erronka; Gipuzkoako goi-hezkuntzako gazteen komunitatea ekimenaren zentzuaren eta ekintzailetzaren inguruan sentsibilizatzera bideratutako jarduera-programa jarriko dute abian.

GAZE proiektua (GAZTE EKINZALE) 2008an sortu zen gure lurraldeko goi-hezkuntzako ikasleen artean kultura ekintzailea sustatzeko xedez, eta Gipuzkoako Foru Aldundiko Berrikuntza, Landa Garapen eta Turismo Sailak babesten du.

GAZE, gobernantzaren oinarrizko printzipioen arabera kudeatu behar zen programa estrategiko gisa hauteman zen hastapenetik. GAZEren gobernantzak, programaren ziklo osoan ikasleen partaidetza aktiboa eskatzen du, eta lau dimentsioren inguruan dago ardaztuta: partaidetza, aniztasuna, konpetentziak eta kultura.

Aurtengoan, proiektua gure lurraldean egoitza duten goi-hezkuntzako hiru erakunderen lankidetzarekin garatzen da: Euskal Herriko Unibertsitatea (UPV/EHU), Mondragon Unibertsitatea (MU) eta TKNIKA lanbide heziketarako sarea.

Gazte aktiboak

Gazte aktiboen erritmora mugitzen da GAZE. Gazte horiek, ekitea aurrera emandako pausoa dela uste dute, eta pausoa emateko modu asko daudela.

Julen Arrizabalaga (Donostia, 1993) LEINNeko -Lidergo Ekintzailea eta Berrikuntza gradua (Mondragon Unibertsitatea)- ikaslea da Irunen. Donostian bizi da, nahiz eta, une honetan, hiriburutik kilometro askora egon. Lierni Ortizek (Zegama, 1992) Ingeniaritza Zibila ikasten du Donostiako Unibertsitate Eskola Politeknikoan (UPV/EHU). Xabier Sanchez, 1990ean jaioa, Pasaiakoa da. Administrazio eta Finantzak gradua ari da ikasten Donostiako Zubiri-Manteo (TKNIKA) Institutuan.

Julen, Lierni eta Xabi, esparru, karrera eta prestakuntza-ziklo ezberdinetatik datoz, baina ez dute egitura egonkor bat eratzen. Sarean egiten dute lan, interkonektatuta, osotasun baten zatiak bailiran. “Profil ezberdinak dituzten pertsonak ezagutu eta sare sozial bat osatu nahi dugu, Gipuzkoa ekintzaileagoa irudikatzeko gai den edonorentzat lekua izango duena”, diote. Horixe da GAZEk duen filosofia, izan ere, jarrera partehartzailea eta gobernantza dira haren ezaugarriak. Hala, denbora igaro ahala, gero eta babes gehiago du proiektuak.

Hiru 'Kolabora' hauek gertuagotik ezagutu nahi badituzu, berriki sortu duten blogean sar zaitezke (http://gaztekintzaile.wordpress.com/). Bertan, aipatu ikasleen profilak ezagutzeaz gain (ikasketak, zaletasunak, iguripenak, GAZEra batzeko arrazoiak, etab.), programarekin lotutako azken albisteak jarrai ditzakezu: aldizkari digitala, mintegiak, hitzaldiak… eta ustekabekoren bat ere bai. Izan ere, denbora batez ikerketan, behaketan eta ikaskuntzan aritu ostean, gazte hauek, inguru hurbilenean (unibertsitatean edo prestakuntza-zikloetan) identifikatu dituzten esperientziak eta praktika onak bistararazteko erronka finkatu dute, betiere, ekimenaren zentzuarekin eta ekintzailetzarekin lotuta.

Blog berria

Programaren barnean egiten diren jarduerak ikusarazi eta haiekiko sentsibilizazioa pizteko asmoz, aurten, http://gaztekintzaile.wordpress.com/ bloga ireki dugu. Espazio horretan aurkituko dituzuen edukiak, GAZEn ‘Kolabora’ modura parte hartzen duten ikasleek taxutzen dituzte. Ikasle horiek, gainera, proiektuko Idazkaritza Teknikoa osatzen duten profesionalen laguntza dute.

Maiatzeko topaketak eta aldizkaria

Une honetan, GAZEko neska-mutilak “kazetaritza lanetan” murgildurik daude burubelarri: harremanak eraiki, elkarrizketak egin, artikuluak idatzi… Sortu berri duten bloga elikatu behar dute eta, horrez gain, maiatzean argitaratuko den aldizkari digitalerako edukiak prestatu behar dituzte. Bigarren fase batean, egindako behaketen emaitzak ezagutarazi eta proiektuko lehen fasean jasotako ezagutza besterentzeko xedez, ikasleek topaketa bana antolatuko dute, beren ikasketa-zentroetan gauzatzekoak. Maiatzean garatuko dira topaketa horiek, “ezagutza besterentzeko mintegiak” izenburupean.

Ekaineko hitzaldi-mintegia

Azkenik, praktiketako ikasleek, ekainean burutuko den “instituzio arteko hitzaldimintegi” baten antolaketan parte hartuko dute modu aktiboan. Mintegi horretako gai zerrenda elkarren artean (EHU, MU eta TKNIKA) zehaztuko dute, eta gai horietan adituak diren pertsonek parte hartuko dute. Hala, erakusleiho itzela izango da ekimenaren zentzuaren sustapenarekin lotutako kasu eta esperientziak agerrarazteko. Horren ondorioz, ideiak proiektu bilakatzeko konpetentziak landuko dira. Halako gaitasunek, zalantzarik gabe, oso harrera ona dute gure gizartean, are gehiago krisialdian eta ikaslearen rola -eta irakaslearena- aldatzen ari den garai batean.

GAZE proiektuak urtero hainbat alternatiba proposatzen ditu Gipuzkoako entitateen arteko lankidetza indartzera bideratuak, ikasle aktiboak protagonista izango dituen heziketa eredu bat finkatzeko asmoz.

Argibide gehiagorako: Leire Cano. GAZEko Idazkaritza Teknikoa (gaztekinzale@gmail.com) http://gaztekintzaile.wordpress.com/ Tfonoa.:943 018395.

MU-Enpresagintzak "International Symposium on Cooperative Education and Governance" delakoan parte hartu du Seul, Korean.

Amaia Aizpuru — 2013-04-15T17:43:07Z

Martxoaren 25, 26 eta 27an, Fred Freudlich eta Juanjo Martin Seul-eko Seodaemun-eko Distritua eta Sungkonghoe-ko Unibertsitateak (http://eng.skhu.ac.kr/) gonbidatuta "International Symposium on Cooperative Education and Governance" delakoan parte hartu zuten MU-Enpresagintza eta MIKen izenean.

Kongresu honetan parte hartu zuten beste erakunde batzuk Cooperative College of Manchester (www.co-op.ac.uk) eta Italiako Cadiai Kooperatiba Sozialen Erakundea (www.cadiai.it) izan ziren. Kongresura gonbidatuak izan ziren parte-hartzaile lokalen artean Seul, hiri metropolitanoko alkatea den Won- soon Park Jauna zegoen eta Seodaemun-eko Distrituko alkatea den Mun Seok Jin Jauna, azken honek distrituko intalakuntzetan jaso zuen ekitaldia.

Gonbidatuen artean Park, Kyung-seo egon zen, Koreako Giza Eskubide Enbaxadorea izandakoa eta gaur egun Nazio Batuetako Korear zentruan giza eskubide politiken inguruko Presidentea dena.

Orain dela gutxi Gobernu Korearrak legedi berri bat atera du kooperatiben sorkuntza errazten duena eta kooperatiba bat sortzeko bost pertsonako kopuru minimoa jartzen duena. Gaur egun, herrialdeak ia 30 urte pasa eta gero, industrializazio arrakastatsu eta azkar bat eta lortutako bizi maila onaren ondoren, daukaten modelu kapitalistaz gain ekonomia sozialean oinarritutako beste modelu baten beharra ikusten dute. Argi dago kooperatibismoak sortzen duen interesa herrialde korearrean eta kooperatiben sorrera eta garapenari ematen ari diren garrantzia administrazio publikoetatik. Kongresu hau eta gero MU-Enpresagintza eta Korea-ko erakunde desberdinen artean proiektuak sortu daitezkela ikusten da, orain arte kolaborazio konbenioren bat sinatu bada ere. Sungkonghoe University-k Korean kudeaketa arloko postgradu desberdinak eskeintzen ditu eta bere pertsonala kooperatibismoaren garapenean murgilduta dago. Inspirazio bila Europara begiratu dute, nahiz eta orain arte kooperatibismo arloan oso esperientzia gutxi izan.

Kongresuaren ohiartzuna Korea-ko webgune eta komunikabideetan: http://m.hani.co.kr/arti/economy/economy_general/580230.html

http://www.co-op.ac.uk/blog-posts/co-operative-spring-gangnam-style/ http://blog.naver.com/soulnlove?Redirect=Log&logNo=90169282161

Ekitaldiaren argazki gehiago:

http://www.flickr.com/photos/enpresagintza/sets/72157633215638283/

Mondragon Unibertsitateko Oñatiko campusak Gizarte Erantzukizunari buruzko jardunaldiak antolatu ditu, tokiko arazoei benetako irtenbideak emateko.

Amaia Aizpuru — 2013-03-07T18:57:54Z

Oñatiko benetako arazoei irtenbideak bilatzeko xedez, 130 ikaslek gogoeta eta lan egiten jardungo dute gaur eta bihar, gizarte-erantzukizunaren ikuspegi batez.

Mondragon Unibertsitateko Enpresagintza Fakultateak Oñatiko campusean antolaturiko gizarte-erantzukizunari buruzko jardunaldietan honako ikasle hauek hartuko dute parte: Enpresen Administrazio eta Zuzendaritza Graduko ikasleek –50 baino gehiago–, Txantxiku Ikastolakoek –30 baino gehiago–, Elkar Hezikoek –20 inguru– eta Zuazola-Larrañakoek –20 inguru–.

Jardunaldiak hainbat asmo ditu: adin desberdinetako pertsonen arteko gizarte-kohesioa bultzatzea, partaideen artean esperientziak trukatzea, eta benetako arazoei elkarlanean irtenbideak eraikitzeko konpetentziak eskuratzea. Jardunaldia bukatzeko, ikasleek herriko benetako arazoei irtenbidea emateko aurkezturiko proiekturik hoberena aukeratuko da.

Proposamen hoberenaren saria

Jardunaldiak bat datoz Mondragon Unibertsitateak gizartea eraldatzeko duen konpromisoarekin, eta ikasleek gizartearen, ekonomiaren eta ingurumenaren alorreko benetako arazoetan oinarrituz lan egitea bilatzen du, horiei irtenbidea eskaintzeko.

Jardunaldia gaur, martxoak 7, 09:00etan hasiko da, eta lehen zeregina gizarte-eginkizunaren esanahiari buruz hausnartzea izango da. Hala, irizpide etikoak ezarriz ingurunean dauden erronka nagusiei erantzuteko moduaz arituko dira ikasleak.

Gero, 10:00etan, diziplina anitzeko lan-taldeak osatu, eta tokiko arazo nagusiak, sozialak, ekonomikoak nahiz ingurumenekoak, aztertuko dituzte. Jardunaldiek arazo horiei erantzuna emateko irtenbideak bilatzea dute helburu, eta sortuko diren taldeek proposamenak eraikiko dituzte.

Eta bihar, martxoak 8, arlo bakoitzean planteatutako arazoen arabera sortzen diren ideiak azalduko dituzte ikasleek. Hala, talde bakoitzaren proposamena 10:30etik 13:00etara bitartean aurkeztuko dira. Hiru finalistak (arlo bakoitzeko bat) sarituko dira. Azkenean, 13:00etatik 13:40era bitartean, arlo bakoitzeko irabazleak aurkeztu ondoren, proposamenik hoberena aukeratuko da eta talde irabazleari sari berezia emango zaio.

Ekitaldiaren argazkiak ikusteko: http://www.flickr.com/photos/enpresagintza/sets/72157632940995202/

Furtwangen University Mondragon Unibertsitateko Enpresagintza Fakultatera hurbildu da.

Amaia Aizpuru — 2013-02-27T19:34:45Z

Furtwangen University-ko bi pertsona, beraien artean "Foco Regional Hispánico" delakoaren zuzendaria -Lucy Lachenmeier- Enpresagintza Fakultatera hurbildu ziren gure fakultatea, ikasketa planak eta metodologiak ezagutzeko helburuarekin.

Beraiekin izandako bileretan gure fakultatearekin ikasleak zein irakasle/ikertzaileen mugikortasuna bultzatzeko hitzarmena sinatzeko interesa aurkeztu zuten. Kolaborazio mota desberdinak aztertu ziren MU-ko Enpresagintza Fakultatea eta Furtwangen University-aren artean.

Bisitaren argazki gehiago: http://www.flickr.com/photos/enpresagintza/8489559962/in/set-72157625154966254/

MEIJI Unibertsitatearen (Tokio-Japon) bisita.

Amaia Aizpuru — 2013-02-27T19:10:00Z

Meiji Unibertsitateko sei ikasle eta bi irakaslez osaturiko talde batek Enpresagintza Fakultatea bisitatu du. Bisita honen helburua ikasle hauek egiten ari diren ikasgai bati erantzutea izan da, ain zuzen, Field Study ikasgaia. Ikasgai horrek kooperatibismoaren azterketa zuzena bilatzen du.

Yamasaki Seiichi eta Matt Noyes irakasle-ikertzaileak MIKeko ikertzaleekin egoteko aukera izan dute, kolaborazio aukerak aztertzeko. Bisita honen ondorio gisa, Meiji Unibertsitatea eta MUko Enpresagintza Fakultatearen artean kooperazio konbenioa sinatuko da.

Bisitaren argazki gehiago: http://www.flickr.com/photos/enpresagintza/sets/72157632829344870/

Gaur asteartea, arratsaldean klaseak normaltasunez emango dira Oñatin eta Bidasoan.

Amaia Aizpuru — 2013-02-25T05:45:00Z

Errepideen egoera aztertu ondoren bi campusetako klaseak normaltasunez emango dira arratsaldean.

Kooperatibismoaren inguruan formakuntza saio bat eskeini zaio Seodaemun, Seul, Korea-ko distrituari.

Amaia Aizpuru — 2013-02-15T16:22:47Z

9 pertsonez osaturiko talde bat hurbildu dira Seodaemun, Seul, Koreatik Enpresagintzara kooperatibismoa eta Mondragon-en inguruko formakuntza saioa bat delata. Talde honetan Seul-eko distrituko alkatea Monn Seok Jin jauna zegoen.

Seminarioaren helburu nagusia kooperatibismoaren inguruko ezagutza, sorrera eta eboluzioa aztertzea izan dira. Seodaemun-eko distrituak bere inguruko gaur egungo kooperatibak sustatzea du helburu eta Seul-eko distrituan beste 100 kooperatiba sortzea bilatzen du.

Bisitaren argazki gehiago: http://www.flickr.com/photos/enpresagintza/sets/72157632769520187/with/8475392035/

Mondragon Unibertsitatearen Bidasoako campusak Gizarte Erantzukizunari buruzko jardunaldia antolatu du, eskualdeko arazoei benetako irtenbidea emateko asmoz.

Amaia Aizpuru — 2013-02-12T23:00:00Z

Bi egunetan zehar, asteazkenean eta ostegunean, 73 ikaslek gizarte-erantzukizunaren bidez Bidasoaldeko benetako arazoei irtenbideak bilatzeko moduari buruz hausnartu eta jarduteko aukera izango dute. Mondragon Unibertsitateko Enpresagintza Fakultateak gizarte-erantzukizunari buruzko jardunaldia antolatu du gaur eta bihar Bidasoako campusean. Fakultate horretako Enpresen Administrazio eta Zuzendaritza graduko 38 ikaslek eta Irungo La Salleko goi mailako Administrazio eta Finantzako 35 ikaslek hartuko dute parte bertan. Jardunaldiak hainbat asmo ditu: adin desberdinetako pertsonen arteko gizarte-kohesioa bultzatzea, partaideen artean esperientziak trukatzea, eta benetako arazoei elkarlanean irtenbideak eraikitzeko konpetentziak eskuratzea. Jardunaldia bukatzeko, ikasleek eskualdeko benetako arazoei irtenbidea emateko aurkezturiko proiekturik hoberena aukeratuko da.

Proposamen hoberenaren saria

“Gizarte Erantzukizuna Bidasoaldean: elkarlanean eraikiz” izeneko jardunaldia bat dator Mondragon Unibertsitateak gizartea eraldatzeko duen konpromisoarekin, eta ikasleek eskualdearen benetako arazoetan (gizarte-, ekonomia- nahiz ingurumen-arazoetan) oinarrituz lan egitea bilatzen du, horiei irtenbidea eskaintzeko asmoz. Arazo horiek RESOT mugaz gaindiko proiektuan antzeman dira.

Jardunaldia gaur, otsailaren 13an, 09:00etan hasiko da, eta lehen zeregina gizarte-eginkizunaren esanahiari buruz hausnartzea izango da. Hala, enpresa-kudeaketan irizpide etikoak ezarriz eskualdean dauden erronka nagusiei erantzuteko moduaz arituko dira ikasleak.

Gero, diziplina anitzeko lan-taldeak osatu, eta Bidasoaldeko arazo nagusiak, sozialak, ekonomikoak nahiz ingurumenekoak aztertuko dituzte. Hala, gizarte-ikuspuntutik, frantsesaren ez-ezagutza, bazterkeria-arriskuan dauden kolektibo berriak eta eskola-porrotaren gorakada aztertuko dira. Ekonomiaren ikuspuntutik, berriz, mugaz gaindiko enpresa-aukeren ez-ezagutza, enpresen arteko lankidetza-eza, eta ekintzailetzarako finantzaziorik eza landuko dira. Azkenik, ingurumenaren ikuspuntutik, hondakinen kudeaketa, uraren berrerabilpena eta ondare naturalaren babesa analizatuko dira.

Lehen eguneko arratsaldean, alor horietan lanean ari diren eragileek aurkeztuko dituzten arazoei erantzuteko irtenbideak bilatzen arituko dira ikasleak; hau da, lan-taldeek arazo horiei erantzuteko proposamenak eraikiko dituzte. Jardunaldi horretan honako eragile hauek parte hartuko dute: Bidasoa-Txingudi Mugaz gaindiko Partzuergoa, Emaus, Mendibil Pedagogia Zentroa, MyL Mugan, SECOT, Txingudiko Zerbitzuak eta Plaiandi Parkea.

Bigarren egunean, osteguna 14an, ikasleek Emausen Bidezko Merkataritzari buruzko tailerrean hartuko dute parte, eta ondoren, aurkezturiko arazoaren arabera, arlo bakoitzean sortu diren ideiak ezagutaraziko dira. Hiru finalista (arlo bakoitzeko bat) sarituko dira eta, azkenean, jardunaldiko proposamenik hoberena aukeratu (13:00-13:30) eta talde irabazleari sari berezia emango zaio.

Pertsonen Garapena eta Taldeetako Lidergoan Adituaren diploma banaketa ekitaldia.

Amaia Aizpuru — 2013-02-11T15:42:35Z

Ekitaldian kurtso adituko ikasle eta irakasleetaz gain, programaren koordinatzailea, Juanje García, Enpresagintza Fakultateko dekanoa, Lander Beloki eta Mondragon Unibertsitateko errektorea, Iosu Zabala izan ziren. Pertsonen Garapena eta Taldeetako Lidergoan Aditua Kurtsoa Mondragon Unibertsitateak antolatutako graduondoko programa bat da. Mondragon Unibertsitateko Enpresagintza Fakultateko Pertsona eta Taldeen Garapena jakintza arloan txertatzen da eta Lidergo eta Zuzendarien garapenerako eremuan formazio eta ikerketa lanak gauzatzen ditu.

Programaren helburuak honako hauek izan dira:

• Ikasleei pertsonen kudeaketari buruzko ikuspegi estrategikoa eta enpresa jardueraren gaineko hausnarketa jarrera eskaintzea.

• Nork bere burua ezagutu eta garatu, gizaki eta erakunde fenomenoen behatzaile ahaltsuago bihurtu ahal izateko.

• Erakunde baten barnean, pertsonak garatzeko behar diren konpetentziak ikasteko marko paregabea eskaintzea.

• Erakundeetan ematen diren gertaerekiko begirada sistemikoa garatu.

• Errendimendua hobetzeko ekintza berriak sortui, enpresa gestioan goreneko mailako emaitzak lortzeko.

Programak duen metodologia bereziari esker, ikaslea bere garapen eta aprendizajearen ardatz bihurtzen da, eta horri esker, ikasgelako eduki eta ekintzen aplikazioa, bere lan jardueran du bere abiapuntua. Hainbat ikasketa gune tartekatzen dira: aurrez-aurreko tailerrak bizipen izaerakoak, ikaskuntza laborategiko taldeko saioak, coaching indibidualeko saioak coach profesional batekin eta online praktika indibidualak, ematen diren gaien inguruan.

Diploma banaketako ekitaldiari buruzko argazki gehiago ikusteko:

http://www.flickr.com/photos/enpresagintza/sets/72157632633494680/with/8424075930/

Mondragon Unibertsitateko Herbehereetako, Madrilgo eta Gipuzkoako 250 ikaslek mundu osoan zehar bidaiatuko dute proiektuak garatzeko.

Amaia Aizpuru — 2013-02-11T11:00:22Z

250 ekintzaile dira, eta beren prestakuntzan, mundu osoan zehar bidaiatuko dute, beste herrialde batzuetako esperientziak ikasteko eta beren ekintzailetza-proiektuak garatzeko. Hau da, proiektuak eta enpresak martxan jartzeko. Eta denek bi ezaugarri hauek dituzte: Mondragon Unibertsitateko LEINN (Lidergo Ekintzailea eta Berrikuntza gradua) –Espainian ematen den bakarra– edo harekin lotutako masterren bateko ikasleak dira guztiak. Gradu horrek ikasteko metodologia goitik behera aldatzen du, ikasleek eginez ikasten baitute, eta ideiak eta proiektuak martxan jartzearen garrantzian oinarrituta baitago. Gainera, ikasle guztiak ekintzaileak dira, edo espiritu ekintzailea dute. Izan ere, egia esan, ez zaie ikasle deitzen; talde-ekintzaileak dira (leinner-ak, ekintzailetzaren argotean), eta lehen ikasturtetik, beren enpresak eratzen dituzte, benetakoak eta benetako diruarekin. Hori da leinnerrek gainditu beharreko erronketako bat. Baina ez bakarra.

LEINN graduan, nazioarteko eskarmentuak ezinbesteko garrantzia hartzen du, eta horretarako, learning journey izeneko bidaiak egingo dira. Horrenbestez, ikasketa-bidaia horiek oso garrantzitsuak dira graduak irauten dituen lau urteetan. Urtero, bidaia bat egingo dute, eta bidaia bakoitzak bere helburuak izango ditu. Lehen ikasturtean, Mondragon Unibertsitateko LEINN graduko ikasle guztiek bi hilabeteko prestakuntza-bidaiak egiten dituzte Tiimiakatemia-ra (Finlandia) –handik hartu zuen Mondragon Unibertsitateak gradu aitzindari hau egiteko ideia–; bigarren ikasturtean, Estatu Batuetara joaten dira, hilabetez; ondoren, hiru hilabetez joaten dira Txina, India, Brasil, Mexiko eta beste herrialde batzuetara, hirugarren ikasturtean.

Lehen ikasturteko ekintzaileak, Herbehereetakoak, Madrilgoak eta Gipuzkoakoak, Finlandian daude honezkero –hain zuzen ere, ekintzailetzaren sorlekuan–, eta beste ikasturteetako ekintzaileek Txinara, Indiara eta San Frantziskora bidaiatuko dute laster, beren prestakuntza osatzeko. Haien guztien helburua beste esperientzia batzuetatik ikastea da, eta herrialde horietan proiektuak martxan jartzea.

Gipuzkoa. Madril. Herbehereak

Ikasturte honetan, graduaren zati bat, enpresekin benetako proiektuak garatzeari buruzkoa, Euskadin emateaz gain –hain zuzen, Donostiatik hurbil, Irunen eta Oñatin, Mondragon Korporazioaren eskutik kooperatibismoaren eta ekintzailetzaren sorlekuak diren herrietan–, Madrilen eta Herbehereetan ere ematen da. Mondragon Unibertsitatean duela lau urte sortutako gradu berritzailea hurbildu nahi zaie leku horietako ikasleei. Hain zuzen, bi leku horietan, 35 ekintzaile daude honezkero.

Lehen ikasturteko ikasleak Finlandian daude; ikasketa-bidaia horretan, zazpi aste egongo dira. Ekintzaileek aukera izango dute finlandiar ikasleekin batera proiektuak sortzeko, eta gaur egungo ikasleek eta graduatutako ekintzaileek sortutako enpresak ezagutuko dituzte. Ikasketa-bidaia horrek beste helburu espezifiko batzuk ditu: konfiantzazko eta nazioarteko lankidetzazko giroa sortzea, kultura-ingurune ezezagun batean proiektuak sortzea, eta programa akademikoan sortutako enpresetako lana antolatzen eta koordinatzen ikastea.

LEINN gradua

Lidergo Ekintzailea eta Berrikuntza nazioarteko graduak (LEINN) egungo gizartearen erronkarik handienetako bat gainditu behar du: XXI. mendeko pertsonen, enpresen eta gizartearen beharrei erantzuteko heztea. Horretarako, goitik behera aldatu du unibertsitate-ikasketen metodologia. Metodologia berriak hiru oinarri nagusi ditu: eginez ikastea, benetako proiektuak garatuz, ikasleek sortutako enpresak ikasketa-tresna izan daitezen; talde-ekintzailetzan aritzea; eta nazioarteko ikasketa-bidaien bidez ikastea. Hona hemen horren emaitza: karrera amaitu eta hurrengo bi urteetan, Finlandiako Team Academyko graduatuen % 47k ekintzaile gisa jarraitzen dute beren enpresetan. Espainian, berriz, unibertsitate-ikasleen % 7 soilik izaten dira ekintzaileak.

Mondragon Unibertsitateko LEINN graduak Finlandiako Team Academyk azken bi hamarkadetan arrakastaz garatutako metodologiak aplikatzen ditu; hau da, goi-mailako hezkuntzan nazioarteko erreferentzia diren metodologiak. LEINN gradua Mondragon Unibertsitateko gradu-titulazio ofiziala da, Europako Goi-mailako Hezkuntza Esparruak onartua. Enpresagintza Fakultateko Mondragon Team Academy unitatean ematen da.

Mondragon Team Academy ekintzailetza-unitatea, LEINN gradua ematen duena, Team Academy ereduaren erreferentzia nagusitzat hartzen da Finlandiatik kanpo. Mondragon Team Academy unitatea Tiimi Akatemia hezkuntza-organismoaren Nazioarteko Sarearen barruan dago. Organismo hori Jyväskylä-ko Zientzia Aplikatuen Unibertsitatean (Finlandia) sortu zen orain dela 18 urte. Team-company bakoitzak bere ikasketa-planarekin sortzen da, eta emaitza bikainak lortu dituzte denek. Hori dela eta, izugarrizko ospe ona lortu dute; izan ere, ikasleen % 36k beren negozioak sortzea lortu dute.

Mondragon Unibertsitateak eta LKSek gobernantzari buruzko unibertsitate-titulu bat sortu dute, politikariei eta gobernariei erakunde eta entitate publikoak zuzentzen laguntzeko.

Amaia Aizpuru — 2013-01-08T12:42:49Z

Gobernatzea ez da erraza, eta are zailagoa da krisi-garai honetan; izan ere, egun, behar-beharrezkoa da tokiko edo lurraldeko erakundeak ondo kudeatzea, udalerrien eta lurraldeen etorkizunerako. Hori dela eta, oso garrantzitsua da erakunde publikoak eta haien entitate instrumentalak arrakastaz gobernatzeko beharrezko gaitasunak lantzea.Mondragon Unibertsitateak, LKSren eskutik, Gobernantzako Unibertsitate Aditua titulua jarriko du martxan. Hain zuzen, tituluaren izena “Gobernua eta Zuzendaritza Exekutiboa Tokiko eta Lurraldeko Erakundeetan” da, eta haren helburua da kargu politikodunen eta zuzendari publikoen zuzendaritza- eta kudeaketa-gaitasunak sendotzea, zerbitzu publikoak ematean hobekuntza eta berrikuntza susta ditzaten.

Edozein gobernu-mailatan funtzio politikoak edo zuzendaritza publikoko funtzioak egiten hasten diren pertsonek konpromiso handia izaten dute. Hala ere, ez dute beti prestakuntza egokia –norberaren jarduera profesionalari lotutakoa izan ezik–, beren gain hartzen dituzten erantzukizunak berme- eta arrakasta-minimo batekin garatzeko.Horrenbestez, ezinbestekoa da politikarien eta zuzendari publikoen gaitasunak indartzea, zerbitzu publikoetan hobekuntzaren eta berrikuntzaren alde egitea, eta herritarrek erakundeetan konfiantza handiagoa izan dezaten lortzea.

Beraz, gure gobernariek eta gure erakunde publikoetan zuzendaritza exekutiboko postuetan aritzen direnek erakunde-gaitasunak eta gaitasun pertsonalak landu behar dituzte; horri esker, erakundeen lehiakortasuna hobetu egingo da, eta tokiko erakundeak hazkunde ekonomikoko eta finantza-iraunkortasuneko tresna izango dira, eta herritarren bizitza-baldintzak hobetzen lagunduko dute.

Prestakuntza hauentzat da: tokiko erakundeetako, lurralde-administrazioetako, erakunde publiko instrumentaletako eta alderdi politikoetako langileentzat; kargu politikodunentzat; eta sektore publikoko zuzendari, goi-funtzionario eta arloko arduradunentzat.

Rafael Jiménez izango da tituluko koordinatzaile akademikoa; esperientzia eta izen handia du administrazio publikoaren eta tokiko gobernuaren arloetan.Zuzenbidean doktorea da EHUn, Demokrazia eta Tokiko Gobernua Fundazioko zuzendaria, Zuzenbide Konstituzionaleko irakaslea Pompeu Fabra unibertsitatean, eta Sector Públic SL aholkularitza-estudioko bazkide zuzendaria. Gainera, enplegu publikoari eta zuzendaritza publikoari buruzko hainbat liburu idatzi ditu.

Egitura akademikoa

Gobernu-maila horietan, kudeaketa politikoa zein zuzendaritza-kudeaketa egiteko, lidergo- eta zuzendaritza-funtzioak izateko ezagutza, gaitasun eta jarrerak behar dira. Askotan, erakunde-egitura horiek udalerrietako erakunderik handienak dira, langile-kopuruari eta aurrekontuei dagokienez. Gainera, erakunde horien jarduerak zuzeneko eragina du egunero herritarren ongizatean.

Ikastaroak blended formatua izango du; alegia, zuzeneko prestakuntza (90 ordu) eta on line prestakuntza (120 ordu) uztartuko ditu. Zuzeneko prestakuntza hiru astean behin emango da: ostiraletan, 15:00etatik 20:00etara, eta larunbatetan, 9:00etatik 14:00etara. Ikastaroa urtarrilaren 25ean hasi eta ekainaren 15ean amaituko da.Gainera, ikastaro-amaierako lan aplikatua egin beharko da, 100 ordukoa. Lan horretan, ikastaroan zehar landutako alderdi bat edo gehiago inplementatzeko eta/edo martxan jartzeko plan bat egin beharko da. Irailaren 20an entregatu beharko da.

Ikastaroak 10 modulu izango ditu. Besteak beste, honako hauek landuko dira: tokiko gobernu bat arrakastaz gobernatzeko eta zuzentzeko oinarrizko erakunde-gaitasunak; herritarren parte-hartzea; aurrekontuak; tokiko erakundeen ekonomia- eta finantza-kudeaketa, eraginkortasunera begira; eta berrikuntza eta IKTak.Moduluak osatzeko, gaitasun pertsonalei eta erlazio-gaitasunei buruzko tailer bana ere egingo dira. Gainera, programak banakako laguntza-prozesu bat hartzen du barne. Prozesu horretan, coach profesional batek bere potentzial osoa garatzen lagunduko dio parte-hartzaile bakoitzari, eta lidergoaren eraginkortasuna hobetzeko ekintzak iradokiko ditu.

Irakasleak Mondragon Unibertsitateko eta LKS-ko profesionalak eta irakasleak izango dira: tokiko eta lurraldeko erakundeak kudeatzen eskarmentu handia duten profesionalak, eta aholkularitzan eta tokiko eta lurraldeko erakundeen zuzendaritzan eta kudeaketan esperientzia duten irakasleak.

Interesa dutenak Mondragon Unibertsitateak Oñatin duen Enpresagintza Fakultatearekin jar daitezke harremanetan, 943 71 80 09 telefono-zenbakiaren bidez edo migarzabal@mondragon.edu e-postaren bidez.

Mondragon Unibertsitateko Oñatiko campusean "Mobile Marketing"-aren inguruko ihardunaldi bat ospatuko da.

Amaia Aizpuru — 2012-12-21T19:25:00Z

Marketing Digital-eko unibertsitate masterraren barne, honako ihardunaldi hau ospatuko dugu. Bertan "Mobile marketing"-aren inguruko hizlari eta esperientzia praktikoak izango ditugu. Jardunaldira hurbiltzeko interesa duten pertsonak Mireia Igarzabal-ekin jarri daitezke kontaktuan 943718009 telefonora deituz. Hemen duzue ihardunaldiaren programaren inguruan informazio gehiago:

14:15 Ongi-etorria Mikel Mesonero, Mondragon Unibertsitateko Enpresagintza Fakultateko Koordinatzaile Akademikoa.

14:30 Konferentzia honako titulupean: "El marketing móvil: Evolución y/o Revolución"- José Mª Martínez, hóPLAY-ren Koordinatzaile Orokorra eta DADA Company-ren Bazkide Fundatzailea.

16:00 Esperientzia Praktikoak I

Deskontu-Txomin Jauregi, Deskontu.com-en sortzailea
MU-Iñaki Lakarra, Enpresa Digitala-ren Koordinatzailea eta mondragon.edu eta mukom.mondragon.edu-ren gestioan kolaboratzaile
Filmatu-Alvaro Andoin, Filmatu.com-en sortzailea

17:00 Kafea

17:30 Esperientzia Praktikoak II

Eroski-Eduardo Saiz, Eroski Markaren Arduraduna
Veiss-Alex Acosta, Diseño Web Veiss Communication-en Software garapena

18:30 Itxiera ponentzia: "El SEO y cómo optimizaro en el MK móvil"-Dani Reguera, Mondragon Unibertsitatekoa irakasle eta ikertzailea.

Mondragon Unibertsitatearen Bidasoako campusean Kepa Acero surflariak bere proiektuak eta grina lanarekin nola uztartu azalduko du hitzaldi batean.

Amaia Aizpuru — 2012-12-17T18:34:26Z

Mondragon Unibertsitatearen Bidasoako campusean, Kepa Acero surflariak azken bidaiez eta proiektu berriez hitz egingo du, datorren asteazkenean —hilak 19—, 18:00etan. Doako berbaldi horrek zaletasun handi bat lanbide nola bilakatu azaltzeko helburua du, eta leku kopuru mugatu du, ehun pertsona gehienez, eta interesatuak email honetara mezu bat bidali behar dute: mmsurf@eteo.mondragon.edu. Epea, azteazkenean goizean amaitzen da. Mondragon Unibertsitatearen Turismo Aktiboko Masterraren eta Surfaren Marketineko Ikastaro Aurreratuaren barruan txertatuta dago.

Kepa Acerok, hasteko, bere ibilbidearen laburpentxo bat eskainiko du, amets eta grinak lanbide nola bihurtu zaizkion azaltzeko. Segidan, Azken Muga - Última frontera bideoaz baliatuta, Alaskatik Patagoniara bakarrik bidaiatzeko proiektua aurkeztuko du. Surfaren alderdirik gizatiarrena, adiskidetasuna, abentura, bakardadea… erakutsi nahi ditu.Izan ere, Kepa Acerorentzat naturarekin ez ezik beste kultura batzuetako pertsonekin ere hartu-emanetan egoteko bitartekoa da surfa. Horrela, beste hedadura bat hartu du kirolak: beti bizkar-zorroan eramango duen giza bizipen izatea.

David Sanchez Bote da MIK kudeaketan ikerketa-zentroko zuzendari nagusi berria.

Amaia Aizpuru — 2012-11-29T16:31:54Z

David Sanchez Bote ikertzaile eta irakaslea –1976an Zumarragan jaioa– izendatu dute enpresen kudeaketari buruzko MIK ikerketa-zentroko zuzendari nagusi. Zentro hau Mondragon Unibertsitateko Enpresagintza Fakultateari loturik dago. MIKeko zuzendari berriak azaroaren 28an hartu du kargua, eta zentroko aurreko zuzendari Aitor Urzelai ordezkatu du. Hura 2009tik gaur egun arte aritu da postu horretan lanean.

David Sanchez Enpresa-aholkularia eta Mondragon Unibertsitateko irakasle ikertzailea da, Enpresen Zuzendaritzan eta Administrazioan lizentziatua Mondragon Unibertsitatean, eta Ekonomiako eta Enpresen Zuzendaritzako doktorea Deustuko Unibertsitatean. MIKeko arduradun berria 2000 urtetik Mondragon Unibertsitatearekin eta MIKekin harremanetan egon da. Unibertsitate horretako irakasle- eta ikerketa-lanak, beste erakunde batzuetako irakasle- eta aholkulari-lanekin uztartu ditu. Arduradun berriarentzat MIKen zuzendaritza onartzea ‘aukera paregabea izan da, izan ere, ikerketaren mundua oso maite du, eta eginkizun hori aukera ezin hobea da sektore horretan jarraitzeko’.

Michigan-eko eta Harvard-eko Unibertsitateak

Sanchez Bote 2000. urtetik ikertzaile lanetan aritu da. Lan hori Mondragon Unibertsitateko Informazio Sistemak irakasgaiko irakasle-lanarekin uztartu du. Gainera, Michigan Unibertsitatean visiting scholar izan da, Community Lab ikerketa proiektuaren barruan.

Hainbat liburu argitaratu ditu, hala nola ‘El cuarto sector en Euskadi’, Innobasquek 2012. urtean argitaratua, eta ‘Sectores de la nueva economía 20 + 20: economía abierta’, 2010eko azaroan Escuela de Organización Industrial EOIk argitaratua. Ikertzaile gisa The Mit press-ek 2012an argitaraturiko Robert Kraut-en eta Paul Resnick-en ‘Building Succeessful Online Communities’ liburuaren argitalpenean ere hartu du parte, besteak beste.

Gainera, nazioko nahiz nazioarteko makina bat hitzalditan eta biltzarretan hartu du parte, eta horietan hainbat ikerketa-lan aurkeztu ditu, hala nola, ‘An open innovation model based on the experience of Basque companies’ lana, 2012an Harvardeko Negozio Eskolak antolaturiko Berrikuntza Irekiari buruzko Nazioarteko 10. Workshopean aurkeztua.

Aholkularitzaren alorrean, David Sanchezek proiektu ugaritan hartu du parte, Consultoría Artesana en Red enpresaren eskutik, hala nola estrategia digitalari buruzko, enpresa irekiari buruzko eta administrazio publikoetan nahiz enpresa pribatuetan praktikako eta lineako komunitateak abian jartzeko proiektuetan.

2011-2012 epealdian, MIKeko egungo arduraduna ‘Openbasque: lankidetzan oinarrituriko berrikuntza irekirantz’ proiektuko ikertzailea izan da. MIK buru izan duen proiektu hori, hain zuzen, Eusko Jaurlaritzaren Industria, Merkataritza eta Turismo Sailaren Etortek programak finantzatu du. Epealdi horretan, bere irakasle lana oso oparoa izan da. Hainbat alorretan eman ditu ikastaroak, hitzaldiak, mintegiak eta lantegi praktikoak, bai gure mugen barruan bai kanpoan. Aurten, Escuela de Organizacion Industrialek eta Mondragon Unibertsitateak antolaturiko ‘Ekintzailetza eta Enpresa Irekia” ikastaroa zuzendu du.

2001ean abian jarri zenetik, MIK zentroak nazioartean erreferente izatea lortu du enpresen kudeaketaren ikerkuntzan, eta bere ereduak, unibertsitateko ikerketa eta enpresara, erakundeetara eta instituzioetara bideraturikoa, bateratu ditu.