Xabier Mendiguren I, polivalientea

Jesus Garmendia-(e)k eginda at 2009/03/17 19:21 |

Xabier Mendigurenen hitzaldi mamitsuaz hausnarketatxoa bideratzeko, ardatz gisa euskalgintza eta komunikazioa gaia hartzea proposatzen dizuet.



Batetik, daukagu ikasle batek Xabierri bota ziona, alegia, Kontseiluak ez dakiela egiten duena “saltzen”: Kontseiluaz ezagutzen duela jendeak
hedabideetan ateratzen dena, hau da, Jaurlaritzarekin, eta bereziki HPSrekin, dituen eztabaida eta katramilak bakarrik, eta askoz gutxiago burutzen dituen jarduera positiboak. Eta antzeko kritika egiten zion euskalgintzari, oro har, UPV-EHUko irakasle Ludger Mees-ek Euskara XXI dokumentuarekiko iruzkinean: Euskara indioen erreserba batean jarri dugu giltzapean eta guk zaintzen ditugu erreserba horien mugak kanpotik datorren (sic) kalteak aldez aurretik neutralizatzeko. (...) “…gure taktika guztiz defentsiboa da, golak ez jasotzea helburu nagusitzat duena”.

Baina bestaldetik, eta beste ertzean, komunikazio politikari dagokionez, daukagu Xabierrek azpimarratu zuena: bera beti dagoela prest edonorekin hitz egiteko, beti printzipioei tinko helduz. Eta jokatu ere, horrela jokatu duela, mota guztietako erakunde eta alderdi politikorekin —PP barne, zehaztu zuen— bildu omen baita bere hamaika urteko ibilbidean. Xabierren berezko aldarte horrek, ez daukat zalantzarik, ate ugari zabaldu dizkio eta lagundu
ere bai Kontseiluaren irudia erakargarriagotzen.

Honenbestez, aurrekoarekin loturiko galdera: euskalgintzan jardun izan
dugunok ez ote dugu batzuetan gutxiegi zaindu izan komunikazio alderdi hori; ez ote gara errazegi “itxi” geure baitan, eta nekez abiatu hitz egitera, geure burua eta jarduera azaltzera, besterik gabe, gure girotik at sumatzen genituenengana?

Nola bizi izan duzu zuk, zeure eguneroko jardueran, arazo hau? Eta
komunikazio politikari begira?

Iruzkinak (4)

Imanol Manterola 2009/03/18 19:43
Nire ustez, zalantzarik gabe, horixe da jarraitu beharreko komunikazioa estrategiarik eraginkorrena: aldartea, edonorekin hitz egiteko prest egotea. Zaila, baina eraginkorra. Eta horrela, agian, "besteengana" heltzeko aukera izango dugu. Kontua da, beste alde horretatik erantzun bera izango dugun.

Gainerako komunikazio estrategiak, komunikabideetan islatuko dena, prentsa oharretan esango duguna... Hori erakundearen estiloaren osagarri da.




Karmelo 2009/03/18 19:44
Komunikazio politikan galdera batzuk erantzun behar dira, nori komunikatu, zelan ( bitartekoa), maiztasuna … eta batez ere ZER komunikatu nahi dugun.
Klasekidearen kritika hortik zihoan eta bat nator. Askotan ZER hori inpotentzia da, gatazka, sufrimendua, zama. Mesu horiekin ezin erakargarriak izan.
Kontseiluak lorpen asko ere baditu. ZER hori “ahal da, posible da” izan daiteke ( hain arrakastatsuak diren “yes, we can / change can happen”) orain artean lorturikoan oinarrituta.
joxepa madariaga 2009/03/18 19:51
Zaila da guk bezala pentsatzen ez duenarekin hitz egitea: hari entzutea, bere pentsakera ulertzen saiatzea eta ondoren erantzutea.
Bestalde, Xabier el al zen bere lanaz nekatu xamar azaldu? Jubilazioaren zain dago, gogotsu...
Alberto Agirre 2009/03/18 19:56
Dudarik gabe euskalgintzak komunikazio-estrategiak hobetzea onuragarria litzateke. Dudarik gabe geure baitan ez geratzea komenigarria litzateke.Nire galdera da ea Kontseiluak esaten dituenak - esateko moduak agian hobetu litezke - esango ez balitu, beste norbaitek esango ote lituzkeen. Eta beste norbaitek esango balitu - Jaurlaritzak berak agian - Kontseilua agian beste mota bateko mezu amable eta "erakargarriagoetan" zentratuko litzateke.

Ez ditugu nahastu behar esan behar direnak eta esateko moduak. Nire ustez, gaur egun Kontseiluak esaten dituenak esan behar dira- nola edo hala baina esan behar dira - asmatu beharko dugu modurik probetxugarrienean esaten. Susmatzen dut askotan komunikazio-estrategiez hitz egiten denean, mezu batzuk ez direla eman behar iradokitzen zaigula. Galdera da ea komunikazio-estrategia eraginkor baten izenean zenbait gai aipatu gabe utzi behar ote diren, esate baterako, Kontseiluak zabaltzen dituen mezu asko eta asko.