Lasarten Ttakunetik dator notizia

Julen Arexolaleiba-(e)k eginda at 2009/02/16 11:14 |

Makinatxo bat lasartear izan ditugu 1. moduluan gure artean: Iñaki Arruti, Jone Miren Hernandez, Jose Mari Agirretxe (Porrotx). Antolatzaileon artean ere bada lasartearrik (Iñaki Urruzola) eta ikasleen artean ere bai (Mailu Arruti). Kasualitatea ote?

Ez da kasualitatea, inondik inora. Aurreiritzi asko deusezten laguntzeko, garrantzitsua da Lasartekoa aztertzea: oraintsu arte herri izan ez den udalerri erdaldun(du)a; PSE-EE-k beti izan du erabateko nagusitasuna udalean… Ez demografikoki, ez politikoki, beraz, ez lirudike Lasartek izan behar lukeenik herri atzindaria euskarari bide berriak zabaltzeari dagokionean.

Baina halaxe delakoan nago ni: teoria eta praktika uztartzen ahalegindu dira Ttakun-darrak azken 20 urteotan. Udaleko euskara-teknikari prestua gidari, herritar euskaldunen desirei forma ematen jarraitzen dute, “sentitu, pentsatu eta egin” ipar hartuta, Porrotxek esaten zigun eran.


(In)formazioa energia dela frogatzen dute: praktikatik gogoeta egiteko jendea sortu da (Jone Mirenen tesia, kasu), eta gogoeta ez ezik bertako praktikak bideak zabaldu dizkie zenbait lasartearri Euskal Herrian aintzindari izateko. Eta horren guztiaren oinarrian, herrian bertan egindako guztia: komunikabideetan, ikastetxeetan, aisialdian, kulturgintzan…


Honenbestez, zorionak Ttakunkideok. Plaza errezagoetan ibilita ere, ez da beste herririk zuek adina aurreratu duenik azken hamarkadetan. Kantitateari begiratuz gero, Lasarteko datu soziolinguistikoak ez dira disdiratsuenak izango; kualitatiboki, ordea, aurrera egiten jarraitzekotan, badugu nora begiratu: Lasarteko euskaldunak beste inongoak baino autozentratuago daude euskararen orainean, herrigintzan. Ez zaudete oraindik ondo, baina hobeto bai, ezta?

Iruzkinak (3)

jon eskisabel 2009/03/18 19:45
Gora Lasarte!!!
Goraaa!!!
Aitor Oiarbide Telleria 2009/03/18 19:52
Erabat a2 hor irakurritakoarekin. Hala ere, irakurtzen ari nintzen bitartean zerak neuzkan buruan: bateko > "Lasarte" gehiago behar ditugu! besteko > Ba al dago "Lasarte" gehiagorik? neu baiezkoan nago. Bat aipatu nahi det.

Eibar
Ez dakit zergatik baina Eibarri buruz hainbat kontu txar entzun izan ditut: "Ez dutela euskaraz ondo egiten" eta gisako perlak.
Neuk ordea pentsatzen det Eibarrek euskarari asko eman diola, boteprontoan hauxek datozkit gogora:
- Industrian tradizio luze aspaldikoa dutenez, industriako zenbait sektoreko euskarazko hiztegi teknikoa. Euskal Herri osoak hor ere badauka zer ikasi.
- Ezjakinen batzuk kontrakoa uste arren, euskalki dotore eta aberats askoa.
- Musika arloan, lehenengo euskal talde heavya eta ONENA > Su ta gar. Pare bat belaunaldietako gazte asko erakarri dituzte euskal musikara eta euskarara.
- Euskararen 8. probintzian, alegia ziberespazioan, blogarien euskarazko komunitate ugariena eibar.org-en.
- IKT kontuetan punta-puntako zerbitzu enpresa > Codesyntax, euskaraz lan egiten duena. Euskalgintza eta kultura arloko elkarte askorentzat lanean dabilena.
- Juan San Martin eta Koldo Zuazo

OHARRA: ez neu, ez nere inguruko inor ez da eibartarra. Badaezpadaere! Besterik gabe, aurreritzi, uste faltsu horren kontra egin nahi nuen.
Ainara 2009/03/27 21:39
Barkaidazue baina herri honetako izen propioa Lasarte-Oria da, beraz mesedez bere izena behar den moduan erabili!! Horrez gain, egia da erdaldun asko daudela Lasarte-Orian, baina euskaldunak ere bai, nahiz eta nabaria ez izan.