Albisteak

Ramon Agirreren hitzaldia, ‘Badu, Bada’ erakusketa eta afaria, lehen lauhilekoa amaitzeko

Kepa Matxain — 2013-01-07T19:20:00Z

Ezohiko eskola izan zen lehen lauhilekoko azkena, EKTko kideok lehendabizikoz Aretxabaletako fakultatea utzi eta Donostiako San Telmo museora gerturatu baikinen, Ramon Agirreren hitzaldia entzun eta segidan ‘Badu, Bada’ erakusketa bertatik bertara ikusteko.

Antzerkigintzan ibilbide oparoa egindakoa da Agirre. Urte horietan guztietan bildutako esperientziatik aritu zitzaigun, azalduz nola hastapenetan antzerkiarekin lotura zeharo “erromantikoa” zuten, eta nola mundu profesionalerako jauzia egiteko ordua kasik oharkabean ailegatu zitzaien. Haren irudiko, orain 20 urte baino profesional hobeak daude egun euskal antzerkigintzan, baina antzerkiak gizartean duen eragina jaitsi egin da. Gisa berean, genero ikuspuntutik ere aldaketa dezentekoak izan direla nabarmendu zuen, “betidanik gizonezkoena izan den lurraldean” gero eta gehiago direlako emakumeek emakumeentzat idatzitako obrak. Horiek, eta beste hainbat gai izan zituen hizpide aktore donostiarrak.

‘Badu, bada’ erakusketak, ostera, euskarak (eta hizkuntza gutxituek oro har), hizkuntz-aniztasunaren munduan zein erronka dituen erakutsi asmo du, etorkizunera begirako gako batzuk emate aldera. Gure gaiarekin lotura estua izanik, gustura ibili ginen, eta eman zigun zer pentsatua.

Azkenik, Aratz erretegiko afari eder batekin amaitu genuen eguna, eta mahai inguruak luze jo zuen, bagenuen eta zertaz aritu.

Etzi, hilaren 9an, hasiko dugu bigarren lauhilekoa, Eñaut Elorrieta eta Josu Zabala musikarien eskolekin.

Abian da EKTren laugarren edizioa, Aretxabaletako kanpusean

Kepa Matxain — 2012-10-30T18:05:00Z

Urriaren 10az geroztik martxan da "Euskal Kulturgintzaren Transmisioa" aditu-tituluaren laugarren edizioa, HUHEZIk Aretxabaletan duen kanpus berrian. Aurten, 24 ikaslek eman dute izena orotara, 11 emakumezkok eta 13 gizonezkok. Gipuzkoarrak dira horietatik 16, bizkaitarrak sei eta arabarrak bi. Ohi modura, asteazkenetan izaten dira eskolak, 15:00etatik 20:00ak ingurura bitarte, eta euskal kulturgintzako aditu zein arituen testigantzen bueltan antolatzen dira.

Ikastaroak badu lantzen diren hizketagaiak, kezkak eta gogoetak ikasgelatik harago hedatzeko bokazioa, eta hori dela eta, hainbat komunikabide ari dira eskoletan gertatzen denaren jarraipen zehatza egiten:

Euskadi Irratiko "Jakin minez" saioan Igotz Alkortak hizlariei eginiko elkarrizketa zabalak izaten dira entzungai ostegunero, 21:00etatik aurrera (aurreko edizioetako elkarrizketak entzuteko sakatu EKT1, EKT2 ala EKT3).

Gisa berean, Berria egunkariko kultura sailean "Arbelari begira" deituriko zutabea argitaratzen dute asteartero, eta bertan Nagore Amondarainek eta Jon Artanok klasean jasotzen dituzten inpresioak papereratzen dituzte (aurreko bi edizioetako zutabeak irakurtzeko sakatu EKT2 ala EKT3).

Azkenik, Berria Telebistan jartzen dituzten bideo laburrak egiten ditu Kepa Matxainek, eta balio izaten dute gonbidatuek jorratutakoari errepaso arin bat emateko (aurreko bi edizioetako bideo laburrak ikusteko sakatu EKT2 ala EKT3).

Matrikulazio-aldia zabalik EKT ikastaroaren 4. ediziorako

Joxe Aranzabal — 2012-06-04T15:15:00Z

Parte hartu nahi duzuenok 4. edizio honetan, honako fitxa hau bete beharko duzue.

Irakasleez, egutegiaz, gaitegiaz, prezioaz eta abarrez informazioa jasotzeko, honako triptikoan aurkituko duzu.

Ezaugarriak

Aurreko hiru edizioetako emaitzak gogoan dauzkagula, EKTren laugarren edizioari honako ezaugarri bereziok jarri nahi izan dizkiogu:

1. Ezagutza bildu

Jaiotzatiko euskaldun ez direnak euskal kulturgintzari egiten ari zaizkion ekarpen anitzei.
Euskal kuturgintzaren baitako jardueraesparruak ekosistema gisara irudikatzeari eta horietako bakoitzean (literatura, kantagintza, antzerkia, hedabideak,…) transmisioa, sustapena eta jakintza zein nola garatu (ahal) diren aztertzeari.
Euskal Herriaren luze-zabalean gertuko komunitatean euskal kulturgintza suspertze aldera egiten diren ekimen aberatsei. Alegia, gune soziolinguistiko erdaldunduenetan ere ernetzen diren dinamikei erreparatu nahi diegu gertuagotik.
Azken 50 urteotan bizi izandakoaz gogoeta egiteari. Lehen pertsonan eragile izan direnen iritziak biltzeari, alderatzeari, aurrera begirako adostasunetan bat egiteari.

2. Ezagutza sortu

EKTn jasotakoa aberastu egin ohi dugu Sorguneak ikertegiaren bidez garatzen ari garen ikerketetan. Era berean, ikerketetan ageri zaizkigun desafioak ekarri egin nahi ditugu EKTra, horiei buruz iritziak jaso eta ekarpenak egiten jarraitzeko.

3. Ezagutza transmititu

HUHEZIko kideok izango gara aurreko edizioetan bildutako uztaren berri emango dugunak. Ikasgelan bertan zein nork bere bidetik sakontzen jarraitzeko bideak zabalduko ditugu. Ikasleen kezkei eta praktika-moduei argi egiteko helburua, azken finean.

Aditu, aritu eta ikasleen arteko hartu-emanaren berri ematen jarraituko dugu euskal hedabideetan. Izan ere, orain arte bezala: “Herri jakintza nahi dugu, eta jakintza herriarentzat nahi”.

Elkar aberasten joango den gurpil birtuosoa osatzen jarraitu nahi dugu: ezagutza biltzea,
sortzea eta transmititzea… izaten eta ekiten jarraitu ahal izateko.

Irakasle arituko diren aditu-arituen zerrenda, landuko dituzten gaien arabera sailkatuta:

Euskal Kulturgintza gerra ostean: aitzindariak
Paulo Iztueta, Larraitz Ariznabarreta.

Gogoeta iragan hurbilaz: irakaspenak
Mari Karmen Garmendia, Jose Agustin Arrieta, Josune Ariztondo, Jose Mari Iriondo, Jose Angel Irigarai.

Euskal kulturgintzaren eko sistemak
Andoni Sagarna, Josean Muñoz, Laura Mintegi, Josu Zabala, Mikel Irizar, Ramon Agirre, Eñaut Elorrieta, Uxue Alberdi.

Testigantzak
Bernardo Atxaga, Ramon Saizarbitoria, Asisko Urmeneta, Anari Alberdi.

Euskal kulturgintzaren berogailuak gertuko komunitatean
Oihane Perea, Joseba Altube, Patrick Quéheille, Maite Davant, Amets Arzallus, Mattin Irigoien, Maider Elkoro, Sagrario Aleman, Amaia Almirall.

Transmisioa irakaskuntzan
Petra Elser, Olatz Zugasti, Isa Isazelaia, Idurre Alonso, Iban del Campo, Arantza Ozaeta.

Sorguneak: formazio teorikoa eta aurreko edizioetako transmisioa
Lorea Agirre, Julen Arexolaleiba, Andoni Eizagirre, Nekane Goikoetxea, Jon Sarasua, Iñaki Urruzola.

Informazio gehiago behar izanez gero, idatzi kulturgintza@mondragon.edu e-postara.

Miriam Lukik Euslandia idatzi du, EKT aditu tituluan oinarritua

Joxe Aranzabal — 2011-06-27T06:25:00Z

Liburuak matazaren tankera dauka, denetariko hariak ditu-eta: ikastaroan entzundako hariak, transkripzioak, prentsako errekorteak, poemak, komikiak, pelikulak, abestiak, pintadak eta musika… Horien guztien hariak ehunzten dira Euslandia liburuan.

Ikastaroan galdera asko sortu zitzaizkon Lukiri eta galdera haietatik beste galdera batzuk ere landu ditu liburuan, euskal kulturgintzari, euskal identitateari, diskurtso eta politika desberdinei buruz, eta baita esperantzaren gainean ere.

Bere testuek ez ezik, ikastaroan izandako adituenek, eta beste idazle eta pentsalari batzuenek ere osatzen dute liburua. Azala, diseinua eta irudiak Concetta Probanzak egin ditu. Mondragon Unibertsitateak eta Lankuk argitaratu dute liburua. Berau Lanku.com denda digitalean eta ohiko liburudendetan dago salgai, 18 eurotan.

Ekainaren 1ean amaitu zen EKTren 3.edizioa

Joxe Aranzabal — 2011-06-22T13:15:00Z

Poemak irakurriz eta aldian behingo oharrez osatu zuen saioa Joxanton Artzek: goxo, sakon, bizi-bixi…

Ikasturtean zehar ikaskide izandako askok osatu dute azken festaren programa. Bakoitzak beretik, hurrenez hurren: Erika Lagomak eta Beñat Gaztelumendik bertso jarriak kantatu zituzten Kepa Matxain lagun zutela gitarra jotzen. Eneko Barberenak liderrez aritu zitzaigun, ohi duen jite komikoa lagun. Karlos Aizpuruaren imintzioak, zirikadak eta ateraldiak etorri ziren gero. Maitane biak, Legarreta eta Beristain, elkarrizketa trafikatzailea eskaini ziguten geroxeago. Hurrengo, 2. edizioan ikasle izan zen Mailu Arrutiren antzerkia etorri zen, ezuste ederrean. Eta, jarraian, dagoeneko bikote artistiko izateko bidean diren Ane Ortizek eta Enrike Letonak flautaldian eskaini ziguten “Txoria txori”. Zain zegoen jada, txanda noiz helduko, Jon Agirresarobe, ikastaldiaren jokaldirik onenen txantxa egiteko. Ikasleez gain, batzorde pedagogiko kideek EKTren ereserkia abestu zuten saioari amaiera emateko, “Hatsa” izeneko kanta. Hori guztia Amaia Zinkunegik eta Arantzazu Altubek aurkeztu zuten. Profesionalak biak, Iñaki Urruzolaren gidaritzapean.

HUHEZIko egitekoekin gustura amaitu eta umore onean Larriño auzora joan ginen Edorta Agirrek prestatutako afari ederra dastatzera. Bapo afaldu eta kantuz eta kontuz bete zen gaua, Ondarruk aguantatu zuen arte.

Mari Karmen Garridori egokitu zitzaion argazkilari-lanetan aritzea. Hona, bilduma.

Bideoak

Azken festako bideoak
Beste bideo honetan, berriz, ikasturte honetan izandako hizlariak ikus daitezke

Dida lipduba: ongi etorri euskararen mundura!

Joxe Aranzabal — 2011-03-18T12:45:00Z

Horretarako, lipdub bat prestatzea erabaki zutenez, bezperatik hasi ziren egitasmoaren nondik norakoa diseinatzen, eta halaxe ikusi ziren fakultatean GaraiONeko zenbait kide erdi izkutuka prestakuntza lanak egiten. Graduondoko ikasleak etorri zirenean, ezusteko ederra jaso zuten, izan ere, ez baitzuten espero horrelako esperientzia bat biziko zutenik.

Tupust batean, antolatzaileek bost taldetan banatu zituzten parte hartzaileak, talde bakoitzak ideia bat garatzeko asmotan-edo. Hala, bada, gizatalde bakoitzak kontzeptu bat landu behar izan zuen, eta gainerako taldeekin adostasunak bilatu. Hori guztia, hamabost minutuan; prozesua dinamikoa bezain bizia suertatu zen.

Honako ideiak azaldu ziren parte hartzaileen artean: eboluzioa, giza-energiaren beharra euskararen mundua elikatzeko, kultur espresioen interdisziplinaritatea... Ideia nagusia laburtuta: komunitatearen indarrak mundu erakargarria sor dezake edonor bertan integratzeko. Leloa: "Ongi etorria gure mundura"

Horrela kontatzen du Iñaki Urruzolak han bizi izandakoa: “Oso denbora gutxian bagenuen sakoneko ideia bat egituratzeko eta horretxera jarri ginen. Berehala talde giro jator, emankor eta alaia somatzen zen gure artean, eta behin ideia jakin bat prestatua genuelarik, berau bideratzeko urratsak ematen hasi ginen”.

Talde bakoitza HUHEZI fakultateko gune batean kokatu zen, mozorro mordo bat eskura zeudenez, talde bakoitzak bere buruari inauterietako jite moduko bat eman zion, eta bere gunean egin beharreko mezuak eta pantomimank adostu zituen.

Iñaki Urruzola hunkituta geratu zen: “Grabaketa lanetan hasi zirenenean, sinkronizazio izugarriarekin errepresentazio ezin dotoroeagoa suertatu zen; halaxe bizi izan genuen ikasle zein irakasleok behintzat. Bukatzeko, sorkuntza ekintza guztiak horrela lantzen direnean edertasuna berez dator. Eskerrik beroenak GaraiON Naturarteko taldeari. Eta, jadanik gure lagunak diren Amaia Gabilondo, Eneritz Ibarra, Alfredo Iturrioz, Uxoa Agirrezabal eta Mireni”.

XXI. mendeko euskaldunen elkarteez gogoeta-prozesua gidatu du SORguneak ikertegiak

Joxe Aranzabal — 2011-03-01T15:45:00Z

1983 urtean sortu zenetik lehen euskara-elkartea Arrasaten (AED), urteotan egindako lanari esker, Topaguneak. 96 elkartetan banatuta, 20.000 bazkide kuotadunetik gora dauzka egun, 450 langile eta 1.400 boluntario herriz herri, eskualdez eskualde, euskaldunon bilgune autoeratuak antolatzen eta milaka egitasmo martxan jartzen.

Mugimendu hori guztia XXI. mendeko erronkei begira jartzeko, Topaguneak gogoeta-prozesu bat abian jartzea erabaki zuen duela urtebete. Prozesu horri hasiera emateko, Sorguneak ikertegiko kideen gidaritzapean, 15 lagunek osatutako batzorde bat osatu zen, 2010eko otsailetik irailera bitartean 7 lan-saio sakon egin zituena, onartu berri den txostenaren lehen zirriborroa osatu bitartean. Oinarrizko dokumentua euskaldunen elkarteetako 50 bazkideren artean aztertu zen segidan. Gerora, txostena eskualdeka aurkeztu zitzaien bazkideei eta bere bidea egin du federatutako elkarte bakoitzean. Makinatxo bat ekarpen egin zaizkio handik eta hemendik hilabeteotan zehar. Prozesu oso parte hartzailea eta emankorra izan da. Joan den larunbatean ikusi ahal izan zenez, gainera, adostasun zabal-zabala bildu du XXI. mendeko euskaldunen elkarteak. Oinarriparrak delako txostenak.

Hor adostutakoak martxan jartzea da orain erronka. Bidelagun jarraituko dugu Topagunearekin ahalegin horretan.

EKTkideok otsailaren 19an “Bilbo eta euskara” ibilbidea egin dugu

Joxe Aranzabal — 2011-02-23T09:00:00Z

Asteazkenero izaten ditugun saioen osagarri, kanpo-irteera egin dugu joan den larunbatean, Bilbora.

Goizeko 11ak aldera elkartu ginen Unamuno Plazan hogeikote bat, euripean. Aterpean sartuta, Aitor eta Pedro Zuberogoitia anaiak, hasi zitzaizkigun, txandaka, “Bilbo eta euskara” binomioak XX. mendean zehar izan duen bilakaeraren berri ematen.

Bidebarrieta kalera etorrita, gerra aurreko “juventud vasca” kokatzen zeneko etxaurrean geldialditxoa eginda, Plaza Berrian beste bat, eta Areatzara hurbilduta Balentin Enbeitaren estatuaren aurrean egin genuen hurrengo geldialdia.

Azkue Ibaizabalera erori zenekoa gogora ekarriaz, Albiako lorategiraino iritsi ginen, Sabino Aranaren estatuaren aurrera. Eta txangoarekin bukatzeko, 13:30 ak aldera, Kafe antzokira.

Azkue, Unamuno, Alfontso Irigoien, Krutwig, Aresti, Etxaburu etab. Gerra aurreko ikastola eta 1960eko hamarkadan abiatutakoa; mende hasierako euskara-katedra eta 70. hamarkadako euskaltegiak; Euskaltzale bazkunetatik egungo elkarte eta konpartsa euskaldunetara; Euskaltzaindia eta Pott banda, etab… 2 ordutan makinatxo bat istorio kontatu zizkiguten Zuberogoitia anaiek Bilboren historiaren euskaltzaletasuna geureganatzeko. Eskerrik asko bioi, horren ondo eta bizi aritzeagatik!

Txikito batzuk hartu eta koadrila handituta, ederto eta armonia ederrean bazkaldu genuen Kafe antzokian bertan. Eta gero gerokoak!

Udaberri aldera hurrengo txangoa egiteko plana martxan da, ja.

Ikusi nahi izanez gero, hona larunbateko planoa eta argazkiak.

Ikasleen iritziz, EKT ikastaroa “lujo bat da”

Joxe Aranzabal — 2011-01-21T11:15:00Z

Julian Beloki kazetariak gidatu zuen elkarrizketa. Telefonoaren bestaldean, berriz, ikasle hauek: Erika Lagoma lesakarra (Bertsozale Elkartea), Manuel Moreno ermuarra (Topagunea, Euskara Elkarteen Federazioa) eta Eneko Barberena arrasatearra (Txatxilipurdi Elkartea).

Hirurek jantzi beharrak bultzatuta eta harremanak egiteko eman zuten izena EKT ikastaroan, bat datoz-eta kulturgintza geroratzeko ezinbestekoa dela elkarren berri izatea. Lelo bat aukeratu behar izanez gero XXI. menderako, “sentitu, pentsatu eta ekin” aukeratuko lukete.

Nahi izate aldera, hementxe entzun dezakezue elkarrizketa, klik eginda beheko playerrean.

EITBk leku berezia sortu dio EKT ikastaroari bere webgunean

Joxe Aranzabal — 2011-01-16T19:45:00Z

Ikasturte honetan ere Euskadi Irratia jarraipen estua egiten ari zaio Euskal Kulturgintzaren Transmisioa aditu tituluari, orain bi urte egin zuen moduan. Oraingoan, Joanes Imaz kazetaria ari da parte hartzen graduondoan, eta bertako saioetan oinarrituta, irratsaio bereziak prestatzen ari da Jakin minez irratsaiorako. Saioak asteartero izaten dira arratsaldeko 21:30ean, Julian Beloki kazetariak aurkeztuta. Errepikapena, aldiz, igande gauetan, 22:30ean. Berritasuna izan da orri bat eskaintzea EKT izenarekin, eitb.com webgunearen barruan, eta erabaki horretan zerikusi handia izan du Arantxa Kalzada Euskadi Irratiko Programa buruak.

Berez, Jakin minez irratsaioa Euskadi Irratiaren ahalegina da unibertsitatea irratira gerturatzeko. Bertan, unibertsitateei buruzko informazioa ematen da, ikasketa berrienak non dauden esaten da, ikasleei eta tesigileei ematen zaie hitza, eta atzerriko unibertsitateen eskaintza ematen da jakitera.

Mikel Laboa gogoan daukagula, Xabier Lete joan zaigu

Joxe Aranzabal — 2010-12-14T18:58:45Z

Abenduaren 1ekoa arratsalde berezia izan da EKTren 3. edizio honetan. Lehen saioan, Ibon Rodriguezek eskaini digu “Mikel Laboa, kultur transmisioaren eredu” izeneko hitzaldia. Hitzaldiaren mamia Ibonek berak EKTn eginiko proiektua izan da.

Bigarren saioan, berriz, Iñaki Urruzolak antolatu eta Onintza Enbeitak aurkeztutako omenaldiari heldu diogu. Idoia Trenorrek aukeratutako argazkiak lagun, hortxe etorri dira, hurrenez hurren, Ixidro Elgezabalen gogoetak, Iratxe Ibarraren bat-bateko bertsoak, Eneko Barberenaren okurrentziak, Miriam Lukiren poemak, Erika Lagoma eta Beñat Gaztelumendiren bertso jarriak, Karlos Aizpuruaren performancea, Isabel Diazen olerkiak, Nere Erkiagaren dantzak, Enrike Letona eta Ane Alonsoren joaldiak, Eñaut Elorriagaren kantuak eta bildutako guztien omenezko kantuak ere bai, bukatzeko, Amaia Zinkunegiren zuzendaritzapean. Juan Luis Etxabururi eskerrak, orobat, aukera izan dugu Mikel gertuago, iku(s)garriago izateko. Kepa Matxainen txinaurri lanari esker eta Mari Karmen Garridok ateratako argazkiei esker, hurrengo batean ere gogora ekartzeko moduan izango dugu 2010eko abenduaren 1a.

Geu eta geurez, Mikel Laboa lagun. Bertan bizi izandakoa norberak aldean daraman moduan, taldetasunak berak damaiguna elkarrekin daramagu, gozagai eta gozagarri.

Xabier Leteren heriotza

Goxotasunaren ostean, ordea, trago garratza berriro abenduaren 4an: Xabier Lete hil! Bestelakoen zain, biltzen gaituen graduondo honetan Xabier Letek berak utzi digun arrastoari errepara diezaiogun:

Azkenekoz, 2009ko maiatzaren 13an izan zen Huhezin. Hara Euskadi Irratian
Eta Berria.infon jasotakoak
Aurretik ere izana zen gure artean, 2008ko apirilaren 29an. Ordukoak Euskadi Irratian, 13. Saioan.

Begiak barrez barre, bihotza negarrez... halaxe gogoratzen zaituztegu, sortzen eta birsortzen jarraitzeko kemenez.

Hasi da Euskal Kulturgintzaren Transmisioa aditu tituluaren 3. aldia

Joxe Aranzabal — 2010-10-14T08:50:00Z

2010eko urriaren 13an abiatu zen Euskal Kulturgintzaren Transmisioa aditu tituluaren hirugarren aldia. Bertan 36 ikaslek eman dute izena, bost probintziatatik etorrita. Julen Arexolaleiba ikastaroko koordinatzaileak egin zien ongi etorria, batzorde pedagogikoko kideekin batera. Julenek ikastaroaren helburuak azaldu zituen, eduki arloak eta lan prozedurak. Ondoren, ikasgelan zeuden guztiek beren burua aurkeztu eta zerk bultzatuta eman duten izena azaldu dute.

Atsedenaren ostean, Joan Mari Torrealdaik hartu zuen hitza. “Egunkariaren epaiketaren harira garatutako diskurtsoak” izan zituen hizpide. Bertan aztertu zituen zelakoak esan ziren euskaraz eta euskal kulturaz akusazioetan eta sententzian. Halaber, aztertu zituen prentsan hizkuntzaz eta ereduen gainean esandakoak. Kezkatuta agertu zen, oraingoz ez baitio akaberarik ikusten oldarrari.

Aditu tituluaren bilakaera

Aditu titulu 2007-2008 ikasturtean egin zen lehen aldiz. Esperientziak erakutsi duenez, sakondu egin behar da didaktika ereduan; hau da, ikasleei aukera handiagoa eman partehartzeko, ikasitakoan sakontzeko, nork bere interesen arabera ondorioak ateratzeko. Arreta berezia eskainiko zaizkie:

Hezkuntza sistemari.
Tokian tokiko ekimen eredugarriei.

Helburuak

Ikastaroak helburua du corpus batean biltzea euskal kulturgintzari buruzko jakintza, barreiatua dago-eta, eta belaunaldi gazteei transmititzea. Halaber, ikusita zelako desafioak dituen euskal kulturgintzak, bilatzen du formazio multifokala eta praktikoa egitea. Hori guztia arituek eta adituek emanda. Beste alorretakoen eskura jarriko du, orobat, kulturgintzaren transmisioan izandako estrategia eta esperientzia partzialak. Horretarako, bi multzo harreman eragingo ditu: aritu eta adituen multzoa eta bihar-etziko eragileen multzoa, gai honetan jantzi nahi duena.

Gipuzkoa Kulturak arreta eman dio EKT ikastaroari, bideo baten bidez

Joxe Aranzabal — 2010-09-24T16:50:00Z

Goiena Telebistak 10 minutuko bideo bat egin du Gipuzkoa Kultura egitasmoarentzat, Euskal Kulturgintzaren Transmisioa, eta bertan azaltzen da zertan den EKT aditu titulua eta zelan datorren ikastaroaren 3. aldia.

Irudi gehienak Eskoriatzan hartuta daude, Mondragon Unibertsitatearen Humanitate eta Hezkuntza Zientzien Fakultatean. Gogorarazi, bestalde, EKTren 3. edizioan matrikulatzeko epea zabalik jarraitzen duela. Urriaren 13an hasiko dira aditu-titulu honen klaseak

Maialen Lujanbioren koadernoa argitaratuko da, EKT aditu titulua oinarri hartuta

Joxe Aranzabal — 2010-09-14T06:30:00Z

Irailaren 16an, ostegunez, HUHEZIk eta Lankuk Maialen Lujanbio bertsolariaren koaderno bat aurkeztuko dute Mintzola fundazioan, Villabonan. Koadernoak izena du “Hau koaderno bat zen (hau koaderno haren berrinterpretazioa da)”, eta biltzen ditu Maialenek 2007-2008 ikasturtean Euskal Kulturgintzaren Transmisioa izeneko aditu tituluan egindako oharrak, ikastaroaren 1. edizio hartan Maialen Lujanbiok ikasle moduan hartu baitzuen parte beste 60 ikaslerekin batera, HUHEZIk eta Arteola Fundazioak gonbidatuta.

Argitaratu berri den koadernoak 260 orrialde ditu, eta bertan Maialenek hausnarketa egiten du, horretarako hainbat baliabide erabilita: testuak, marrazkiak, koloreak, bertsoak... Antzematen da egileak Arte Ederrak egin zituela. Jon Sarasua irakasleak horrela ikusi du Maialenen lana, koadernoaren hitzaurrean:

Tartean, han atzealdeko aulkietan, Maialen. Galdera gutxi eginez ahoz. Galdera asko eginez bere baitan. Bere begiratu berezi horren galbahetik koadernora pasatakoak, ikasturtean jasotakoaren argazki album bat bezala dira. Argazki-album bat mimatua, eta fotoshopean landua. Nola goaz? Galderak airean segitzen du, eta Maialenen sorkuntza ikasle senari dagokiona da oraingoan. Apunteen bidez, gure sorkuntzari buruzko oldozpenaren lekukotza inpresionista bat eskaintzen digu, gaurko jakingarri eta biharko oroigarri.

EKT aditu titulua

HUHEZIk eta Arteola Fundazioak helburu batekin sortu zuten Euskal Kulturgintzaren Transmisioa izeneko aditu titulua: corpus batean biltzea euskal kulturgintzari buruzko jakintza barreiatua, eta belaunaldi gazteei transmititzea. Ikastaroak bilatzen zuen, halaber, formazio multifokala eta praktikoa ematea euskal kulturgintzak dituen desafioen aurrean. Hori guztia arituek eta adituek emanda.

Lankurekin batera

Mondragon Unibertsitatearen Humanitate eta Hezkuntza Zientzien Fakultateak eta Arteola Fundazioak Lanku izan dute bidelagun argitalpen honetan, enpresa bat Bertsozale Elkarteak sortua bertsolaritzaren azpiegitura indartzeko. Lankuk kudeatzen ditu beharrezko diren baliabideak, materialak zein giza alorrekoak, edozein kultur ekitaldi sortzeko eta antolatzeko, eta helburua du bertsolaritza indartzea, herri mugimenduaren antolakuntza errespetatuta.

Ireki da matrikulazio epea Euskal Kulturgintzaren Transmisioa aditu tituluaren 3. ediziorako

Joxe Aranzabal — 2010-05-13T08:35:00Z

Euskal Kulturgintzaren Transmisioa (EKT) aditu tituluak dena prest dauka ikastaroaren 3. aldiari ekiteko. Hori dela-eta, triptiko bat prestatu du, informazio zabala ematen duena datorren ikastaroaren gainean, eta ireki egin du matrikulazio epea: maiatzaren 10etik irailaren 30era izango da, eta berau bi modutan egin ahal izango da:

Eskoriatzara etorrita, Mondragon Unibertsitatearen Humanitate eta Hezkuntza Zientzien Fakultatera. Bertan, idazkaritza zabalik egongo da goizez 09:45etatik 12:00ak bitartean eta arratsaldez 15:30etik 17:30era.
Matrikula orria bete, postaz gutun zertifikatu bidez bidalita helbide honetara: Euskal Kulturgintzaren Transmisioa, HUHEZI. Dorleta auzoa z/g Eskoriatza 20540

Matrikula egitea 2.000 € kostatuko da, berau hiru zatitan ordaintzeko aukerarekin. Ikastaroa bera 2010eko urriaren 13an hasiko da, 2011ko ekainaren 1a arte. Asteazken arratsaldetan emango da, 15:00etik 20:00ra.

Aditu titulu 2007-2008 ikasturtean egin zen lehen aldiz, orduan 60 ikaslerekin. Bigarrenean, berriz, 30 ikasle aritu ziren.

Helburuak

Ikastaroak helburua du corpus batean biltzea euskal kulturgintzari buruzko jakintza, barreiatua dago-eta, eta belaunaldi gazteei transmititzea. Halaber, ikusita zelako desafioak dituen euskal kulturgintzak, bilatzen du formazio multifokala eta praktikoa egitea. Hori guztia arituek eta adituek emanda.

Beste alorretakoen eskura jarriko du, orobat, kulturgintzaren transmisioan izandako estrategia eta esperientzia partzialak. Horretarako, bi multzo harreman eragingo ditu: aritu eta adituen multzoa eta bihar-etziko eragileen multzoa, gai honetan jantzi nahi duena. Guztira 50 inguru espezialistak hartuko dute parte edizio honetan, aritu nahiz aditu moduan.

Txostengileak

Hizlarien artean, euskal kulturako jende ezagunak hartuko du parte: Joxan Artze, Aitzpea Leizaola, Antton Luku, Maite Goñi, Andoni Egaña, Gotzon Barandiaran, Ramon Saizarbitoria, Xabier Montoia, Aizpea Goenaga, Joan Mari Torrealdai, Garbiñe Agirre, Kirmen Uribe, Oier Araolaza, Mari Luz Esteban, Dionisio Amundarain eta Joserra Gartzia, besteak beste.