Aditu titulua 2007-2008

Ikastaroaren lehen aldia

Hainbat urtez euskal kulturaren inguruan elkarrekin hausnartu ondoren, 2007an Arteola Egitasmoak eta Mondragon Unibertsitateko Huhezi fakultateak erabaki zuten garaia zela graduondo bat prestatzeko Euskal Kulturgintzaren Transmisioaz. Jon Sarasuak azaldu zuen euskal eragileen artean zabalduriko kezka: "Nora goaz euskal kulturgintza moduan? Ez al daude hainbat krisi sintoma inportante? Ez al dugu asmatu gure hezkuntzan gure kulturgintzak eman duen ondarea transmititzeko bideetan? Hainbat gabezia ikusten ditugu geure kulturgintzan; oro har, ez daukagu plazarik, ez daukagu gogoeta gunerik, ez daukagu geure hezkuntzan transmisioa egiteko estrategiarik..." Ekimen horrek bi berrikuntza ekarri zituen: gogoeta gune hezitzailea sortzea, euskal kulturgintzaren inguruan aurrekaririk ez zuena, eta estatus akademikoa ematea euskal kulturgintzaren transmisioari.

Josune Zabalak gidatuta, Batzorde Pedagogikoa lanean jarri zen, ikastaroa prestatzen: Joseba Azkarraga, Jesus Garmendia, Andoni Mujika, Jon Sarasua eta Iñaki Urruzola. Horrela, 2007ko urrian, abiatu egin zen Euskal Kulturgintzaren Transmisioa graduondoa. 60 lagunek eman zuten izena lehen aldi hartan, Hego Euskal Herrikoak. Aurrean, izen handiko irakasleak, adituak batzuk eta arituak besteak, hala nola, Anjel Lertxundi, Xabier Lete, Mariasun Landa, Benito Lertxundi, Ander Manterola, Joseba Zulaika, etab. Denak Dorleta eraikineko ikasgela handi batean, bereziki hornitua ikastarorako.

Ikastaroak ikasturte osoa iraun zuen, zortzi hilabete, eta aldi horretan ikasleek behar handia egin zuten: hainbat lan txiki ikastaroan barrena, eta azken proiektua, bukaeran. Emaitza oparoa izan zen, oso, eta horrek konbentzitu gintuen aurrera egiteko esperientziarekin.