Zer da Team Academy?

Enpresaritza irakasteko/ikasteko metodologia berritzailea da Team Academy. Taldeka eginez ikasten duten enpresari-ikasleen garapena eta formazioa xede duen eskola hau, Jyväskylä-ko (Finlandia) Unibertsitate Politeknikoaren barne kokatzen den unitate independientetzat defini dezakegu. Team Academy 1993an sortu zen, Marketing-eko irakasle zen Johannes Partanen-ek fakultateko iragarki-oholean zintzilikatutako mezuari erantzun zieten 24 ikaslek osatu zuten lehen taldearekin. Mezuak honela zioen: “Munduari bira eman eta, bide batez, marketing pixka bat ikasi nahi duzu?”. Horrela eman zitzaion hasiera irakasteko/ikasteko modu berri bati. Enpresa sorkuntzan aitzindari den talde honek egindako ibilbidearen arrakastaren isla da 108 enpresa sortzaile sortu izana.

Metodologia, ikasleak eta coach-ak

Ikasgela batean ohiko diren altzairuek borobilean kokatutako besaulki eta sofei egin diete leku Team Academy-ren egoitzan, horrela elkarrizketarako giro atsegin eta lasaia sortuz. Ohiko irakaskuntza metodologiak baztertu eta prestaketa saioetan egituratzen da ikaskuntza/irakaskuntza, teoria eta praktika benetako bezeroekin praktikan jartzen diren proiektuen bitartez uztartuz. Team Academyren oinarrian ikasleek beren ikaskuntzaren ardura beren gain hartzen dutenaren oinarrizko printzipioa dago. Ildo horretan, irakaslearen irudiak “coach”ari egin dio leku. Egun 500 ikasle inguruk eta 5 “coach”ek osatzen dute taldea. Ikasleari esleitzen zaion protagonismoak azaltzen du horrenbeste ikaslerentzako hain coach gutxi izatea.

Ikasleek garrantzi handia esleitzen diote coacharen irudi eta egitekoari. Hasiera batetik coachak ikasleei eta ikasleek coachari bakoitzak besteagandik zer espero duten argi azaltzen diote. Horrez gain, elkarren arteko feedbacka etengabea da, norabide batean zein bestean. Aitzitik, coacharen zereginetarik garrantzi gehien feedbacka emateari egozten diote ikasleek. Horrez gain, azken test edo azterketan (erditze saio bezala definitzen dutena “giving birth session”) lortzen diren emaitzek taldeaz gain coacharen mailaz ere asko esaten dute; finean, taldeak huts egiten badu, hutsegite horren arduraren zati bat coachari berari ere baitagokio.

Team Academyren misioa eta bisioa

Misioari dagokionez bi alderdi azpimarratzen dituzte: taldean jardungo duen enpresaria formatzea eta baloreak eskuratzea. Erronken artean, etorkizun hurbilean, 2008rako zehazki, enpresa sorkuntzari dagokionez Finlandiako unitaterik garrantzitsuena izatea dute xede. Aitzitik, 2037rako mundu mailara zabaldu dute beren helburua.

Zer eskaintzen die Team Academyk ikasleei?

Enpresari izanez enpresaritza ikasteko leku bat eskaintzen die, taldean diharduen enpresaria izateko aukera. Beren interesa ez baita enpresari huts izatera mugatzen, baizik eta horrekin batean, taldean lan egiten ikastea dute xede. Azken buruan, taldean jardun beharko dute ez enpresa mailan bakarrik, baita familian, lanean edota bizitzan orobat. Hartara, eta abiapuntua hori izanik, norberaren gain gelditzen da bakoitzaren potentzialaren asebetetze maila eta Team Academyk eskainitako praktikari norberak ematen dion erabilgarritasun maila ere.

Ohiko metodologiarekin konparazioan, Team Academy ondoko bi ezaugarriok definitzen dute:

1.    Ikasleak eginez ikasten du, badaki teoria praktikan jartzen:

•     Norberak bere kasa lan egiteko aukera du.
•     Norberak bere ardurak hartzen ditu eta helburu propioak ezartzeko aukera du.
•     Norberak bere buruari erronka egiteko aukera du.
•     Nork bere burua garatzeko aukera du.
•     Etengabeko erronkak eta hobetzeko aukerak ditu.

2.    Sarearen esanahia ikasten du, jende berri ugari ezagutzeko aukera izateaz gain, enpresari den heinean, bezeroak ere baditu, ohiko metodologian gertatzen ez den bezala.

Horrez gain, gaitasun desberdin eta anitzak ere eskuratzen ditu, hala nola,

•     Taldean jarduteko gaitasuna, izan ere, bakoitzak bere talde konpainia du, etengabe ari da bere taldearekin lanean.
•     Proiektuak sortu, egituratu, garatu eta abian jartzeko gaitasuna.
•     Negoziatzeko gaitasuna.
•     Enpresaria zarenean behar dituzun baliabideak, bitartekoak…
•     Akatsetatik ikasten ikasten da.
•     Lidergoa edo zuzentzeko gaitasuna.

Haatik, gaitasunok ohiko unibertsitate ereduan ere ikas daitezkeela pentsa dezake norbaitek. Eta hala da, baina teorian bakarrik, ohiko ereduak ez baitu horietan praktikan trebatzeko aukerarik eskaintzen, Team Academy-k egiten duen eran. Izan ere, Team Academyn norberak/taldeak aurkitu behar ditu erantzun zuzenak; ez dago jada erantzun zuzenak ematen dituen irakaslerik, ez eta ikasle pasiborik ere. Ikaslea talde bateko partaide eta, aldi berean, talde horren arduradun ere bada. Partaide aktiboa izateaz bat, bere taldearekin batean, norberari baitagokio erantzun zuzenak aurkitzea.

Lidergo gaitasunen sustapena

Lidergoa arrakasta lortzeko baldintzak sortzean datzala ulertzen dute Team Academyn. Beraz, ez da beharrezkoa titulu bat eskuratzea horiek garatzeko, ama batek, scout-en liderrak… ere lideratu egiten baitute, finean. Team Academyn egiten dutena ahalik eta ikaskuntza erronka gehien sortaraztea da, norberak bere lidergo gaitasunak praktikatzeko guneak sortuz. Hori da Team Academytik jendeak eskuratzen duen ekarpen nagusia: lidergoa arrakastarako baldintzak sortzean datzala, baina gainera, hori edonoren esku egon daitekeela.